«Ժառանգության» առաջնորդ Րաֆֆի Հովհաննիսյանը այսօր հրաժարվեց մանրամասնել, թե ինչ մտահոգություններ է ներկայացրել ու ինչ հարցեր է քննարկել երեկ ԱԺ նախագահ Հովիկ Աբրահամյանի հետ: Նա ասաց՝ այդ մասին կպատմի երկուշաբթի օրվա ասուլիսի ժամանակ:
«Ժառանգություն» կուսակցության փոխնախագահ Արմեն Մարտիրոսյանն էլ Aravot.am-ին ասաց, որ հանդիպման մանրամասները չգիտի, իսկ ինչ վերաբերում է հանդիպումը «VIP սալոնում» անցկացնելուն հավելեց. «Մանրամասներ չգիտեմ, հակառակ պարագայում նման առանձնազրույցը հրապարակային կարող էր լինել: Չեմ կարծում, որ նմանատիպ առանձնազրույցները հրապարակային իրականացնելու փորձ աշխարհում շատ կա: Ողջունելի է պարոն Աբրահամյանի այցը Րաֆֆի Հովհաննիսյանին, իսկ այն, ինչ քննարկել են, ինչպես Րաֆֆի Հովհաննիսյանն ասաց, կներկայացնի երկուշաբթի օրը»:
Անդրադառնալով Հ. Աբրահամյանի երեկվա հայտարարությանը, թե Ր. Հովհաննիսյանի պահանջները՝ ընտրությունների 2-րդ փուլ նշանակել կամ ԱԺ արտահերթ ընտրություններ նշանակելը ողջամիտ չեն, իսկ իշխանությունները պատրաստ են փոխզիջումների ու կողմնակից են խելամիտ առաջարկներին, պարոն Մարտիրոսյանն ասաց. «Հարցը ոչ թե փոխզիջումներն են այլ առաջացած ճգնաժամը լուծելո՞ւ ենք, թե՞՝ոչ: Այն, որ ճգնաժամ կա, ակնհայտ է: Այն որ, այդ ճգնաժամը համակարգային է, համապետական է կրկին ակնհայտ է: Լուծումները կարող են լինել միայն համապետական ու համակարգային: Պարոն Աբրահամյանը ներկայացրեց իր կարծիքը, բայց ես չեմ կարծում, որ նմանատիպ կոսմետիկ քայլերով հնարավոր կլինի առկա ճգնաժամը հաղթահարել»:
Արփինե ՍԻՄՈՆՅԱՆ
