«Վերջին 45 տարվա ընթացքում ճանաչել եմ հազարավոր հայերի, ովքեր իրենց մշակույթն են փոխանցում ամբողջ աշխարհին: Ես որպես հարազատ ընկեր եմ այցելում Հայաստան: Ես չեմ երգում այնպիսի վայրում, որը ինձ դուր չի գալիս: Կարծում եմ` ինձ շատ տարիներ չեն մնացել ապրելու, բայց սիրով եմ երգելու Երևանում»,-այսօր «Գոլդեն Թուլիպ» հյուրանոցում լրագրողների հետ հանդիպմանն ասաց աշխարհահռչակ իսպանացի երգիչ Խուլիո Իգլեսիասը, ով երկուշաբթի համերգով հանդես կգա Կարեն Դեմիրճյանի անվան մարզահամերգային համալիրում:
Իգլեսիասն ասաց, որ արդեն հետաքրքրվել է, թե իր որ երգերն են սիրում հայերը եւ հենց դրանք էլ կատարելու է. «Ես հոգով եմ երգելու. փակելու եմ աչքերս եւ պատկերացնելու, որ տիեզերքում եմ»:
Երգչի խոսքով. «Երբեմն մարդիկ մտածում են, թե մենք մեծ երազողներ ենք, բայց իրականում մենք նախընտրում ենք ուրիշներին «ստիպել» երազել»:
Խուլիո Իգլեսիասը տեղեկացրեց, եր եւեւանյան համերգից առաջ երգել էր Ռուսաստանում եւ Ուկրաինայում, իսկ Հայաստանից մեկնելուց հետո համերգներ կտա Դուբայում, Սինգապուրում, Բրազիլիայում եւ այլուր:
Կարդացեք նաև
Իգլեսիասը խոսեց նաեւ Շառլ Ազնավուրից եւ ասաց, որ վերջինս իր երկար տարիների մտերիմ ընկերն է. «Ես նրա հետ եմ մտածել եւ երգել, բազմաթիվ դուետներ կատարել: Նրան իմ ավագ եղբայրն եմ համարում»: Երգիչն ասաց, որ իր կյանքը բաղկացած է հազարավոր երգերից, որոնցից չի կարող առանձնացնել երեւէ մեկը. «Դրանք իմ կյանքի պատմությունն են կազմում»:
Իգլեսիասը նաեւ ասաց, որ երբեք լավ ֆուտբոլիստ չի եղել, չնայած «Ռեալ Մադրիդում» է խաղացել. «Ես ավելի լավ երգում եմ, քան ֆուտբոլ խաղում»:
Լուիզա ՍՈՒՔԻԱՍՅԱՆ
