Մարտի 15-ին ՀՀ բնապահպանության նախարարությունում կայացել է «Խաչաղբյուր-2» փոքր ՀԷԿ-ի հետ կապված քննարկում, որը վարել է բնապահպանության նախարար Արամ Հարությունյանը: Փորձագետները ներկայացրել են ՓՀԷԿ-ի բնագիտական փորձաքննության եզրակացությունը:
Գետահովտի գյուղապետ Արթուր Ղազարյանը մեզ հայտնեց,որ բնագիտական փորձաքննության վերջնական եզրակացությունը կներկայացվի 20 օրից: Այդ ընթացքում կճշտվեն մի քանի հարցեր, այդ թվում ՝ ՀԷԿ-ի շինարարության գոտում գտնվող արջատխլենու պուրակն ունի՞ արդյոք արգելավայրի կարգավիճակ:
Գյուղապետն ասաց, որ քննարկմանը ներկա են եղել Գետահովիտ համայնքի բնակիչներ: Արթուր Ղազարյանի խոսքերով՝ ինքը կողմ է «Խաչաղբյուր-2» ՓՀԷԿ-ի շինարարությանը, քանզի դրա սեփականատերերը ստացած շահույթից տարեկան 6 միլիոն դրամ են փոխանցելու համայնքի բյուջե, դրա համար արդեն պայմանագիր կա: Բացի այդ, ՓՀԷԿ-ի սեփականատերերը ամեն տարի 20 հազար հատ կարմրախայտ են լցնելու գետը, գյուղում հիմնելու են կաթի ընդունման կետ, Գետահովտում գիշերային լուսավորություն են անցկացնելու, որը լինելու է առանց լարի, արեւային էներգիայով սնվող:
«Եթե բնագիտական փորձաքննության եզրակացությունը լինի դրական, գյուղի համար լավ կլինի»,-հավելեց Արթուր Ղազարյանը: Նա ասաց, որ առաջիկայում իրենք կանդրադառնան նաեւ այն հարցին, թե ինչու գործող «Խաչաղբյուր-1» ՓՀԷԿ-ի շահույթներից համայնքին մասհանումներ չեն կատարվում:
Կարդացեք նաև
Իջեւանի «Պրոգրես» ՀԿ նախագահ Գեղեցիկ Գուլակյանը մեզ հայտնեց, որ գետահովտցիներն իրենց հետ բնապահպանություն նախարարություն էին տարել «Խաչաղբյուր-2»-ի կառուցումը սատարող պաստառներ:
Ոսկան ՍԱՐԳՍՅԱՆ
