«Այո, Մեծ Պահքի շրջան է: Եվ այն, ինչ ես անում եմ, ոչ հացադուլ է, ոչ ծոմ է, այլ մեր հաղթական պայքարի վճռորոշ հանգրվանում»,- Ազատության հրապարակում այսօրվա հանրահավաքին ասաց Րաֆֆի Հովհաննիսյանը:
Նա հայտարարել էր, որ այլեւս որեւէ մեկի խոսքերը չի մեկնաբանելու, բացի ՀՀ նախագահ Սերժ Սարգսյանից: Այսօր նա ավելացրեց եւս մի հոգու. «Թող ոչ մեկը, անկախ աղբյուրից, հաղորդագրություններով ինձ հետ չխոսի: Սրանից հետո ես կմեկնաբանեմ ոչ թե միայն մի հոգու՝ Սերժ Սարգսյանի խոսքերը, այլ 2 հոգու՝ Վեհափառ Հայրապետի խոսքերն էլ: Մեր կողմից ոչ մի քաղաքական գնահատական կամ շանտաժ չկա: Ամոթ այս հայտարարության հեղինակներին: Այո, աղոթքի շրջան է, եւ ինչպես ես ամեն օր աղոթում եմ Վեհափառ հայրապետի եւ պարոն Սարգսյանի համար, ես անցած անգամ խնդրեցի, որ նրանք էլ աղոթեն ինձ համար եւ ճշմարտության համար, բայց ոչ երբեք ստի, կեղծիքի համար»:
Նա տեղեկացրեց, որ ինքը մկրտվել է եւ պսակվել է Հայ Առաքելական եկեղեցում. «Իսկ եթե հաղորդագրության միջոցով ինձ սպառնալ, որ չեն ուզում ինձ թաղել Հայ առաքելական եկեղեցու մեջ, ինձ որոշեք ցանկացած անկյուն՝ Հայաստանի Հանրապետության, որովհետեւ ամեն մի անկյուն, ամեն մի հող դա իմ սրբությունն է»: Նա խնդրեց, որ Աավետարանը չմտցնեն այս քաղաքացիական պայքարի մեջ. «Պետությունը եւ եկեղեցին անջատ են, ոչ թե մեկը մյուսի կցորդն է: Երբ ասում ենք՝ հավատ, հույս եւ սեր, դրանք ճշմարտության, իրավունքի ճամփան են»:
Անդրադառնալով Նիկոլ Փաշինյանի առաջարկին՝ նա աաց, որ դեռ կորոշեն, թե որտեղ կազմակերպեն քննարկումները՝ «Ազատությա՞ն» հրապարակում, թե՞ Հանրապետության հրապարակում:
Կարդացեք նաև
Հռիփսիմե ՋԵԲԵՋՅԱՆ
