Մակեյանը դեմ չէ միասնական ցուցակին, Գիմիշյանը կքննարկի Հրանտ Բագրատյանի եւ Արամ Զ. Սարգսյանի հետ
Այսօր Aravot.am-ը «Ժողովրդական հայրենիք» կուսակցության նախագահ Պետրոս Մակեյանից եւ Հայաստանի քրիստոնեա-ժողովրդավարական վերածնունդ կուսակցության նախագահ Սոս Գիմիշյանից հետաքրքրվեց, թե ինչ են որոշել Րաֆֆի Հովհաննիսյանի առաջարկի հետ կապված:
«Ժառանգությունը» նրանց եւ ՀԺԿ-ին, ինչպես նաեւ Անդրիաս Ղուկասյանին առաջարկել էր Երեւանի ավագանու ընտրություններում միասնական ցուցակով մասնակցել:
Պետրոս Մակեյանը հաստատեց, որ նման առաջարկ եղել է. «Մենք այսօր ժամը 3-ին քաղաքական խորհրդի նիստ ենք հրավիրել, օրվա ընթացքում այդ հարցի պատասխանը կլինի: Բայց կարող եմ նախնական ասել մեր քաղխորհրդի անդամների տրամադրությունները, որ նրանք դրական են տրամադրված: Բայց այն կողմով, որ ընդդիմությունը միասնական ճակատով հանդես գա եւ առանցքը լինի ընդդիմադիր առաջատարի շարժումը, հավաքվեն Րաֆֆի Հովհաննիսյանի շարժման շուրջը»:
Կարդացեք նաև
Սոս Գիմիշյանն ասաց, որ դեռեւս որոշում չունեն եւ մինչեւ օրվա վերջ նոր վերջնական կասեն՝ համաձա՞յն են միասնական ցուցակով մասնակցել, թե՞ ոչ. «Մենք այս հարցի շուրջ նախկին պայմանավորվածություն ունեինք, խոսակցություններ ենք ունեցել ե՛ւ Հրանտ Բագրատյանի, ե՛ւ Արամ Սարգսյանի հետ: Իրենց հետ մեր համատեղ գնալ-չգնալը որոշելուց հետո նոր կորոշենք «Ժառանգության» առաջարկի մասին»:
Հռիփսիմե ՋԵԲԵՋՅԱՆ
