Այսօր ՀՀ ԱԺ պետաիրավական հարցերի մշտական հանձնաժողովի նիստի ժամանակ, երբ քննարկվում էր խորհրդարանում 2008 թվականի մարտի 1-2-ի դեպքերն ուսումնասիրող նոր ժամանակավոր հանձնաժողով ստեղծելու հարցը, ՀՀԿ-ական պատգամավոր Կարեն Ճշմարիտյանը հիմնական զեկուցող ՀԱԿ պատգամավոր Գագիկ Ջհանգիրյանից հետաքրքրվեց՝ իր կարծիքով որեւէ ժամանակավոր հանձնաժողով սկզբունքորեն ի՞նչ արդյունք կարող է տալ: Գագիկ Ջհանգիրյանը հեգնեց. «Ես մարդ գիտեմ, որ 10 աղջիկ ունի, բայց 11-րդը տղա է ունենում: Եթե այդպես շարժվենք, ապա երրորդ աղջկանից հետո պետք էր մտածել էդ կնոջ հետ ընդհանրապես անկողին մտնելու մասին»:
Կարեն Ճշմարտիտյանը փորձեց պարզաբանել, որ իր խոսքը կոնկրետ «մարտի 1»-ի հանձնաժողովին չի վերաբերվում, այլ ընդհանրապես ժամանակավոր հանձնաժողովների գործունեության արդյունքներին ու կարծիք հայտնեց, որ դրանք ոչ պետական, ոչ քաղաքական, ոչ էլ իրավական հարցերում արդյունք չեն տալիս իրականության մեջ:
Ջհանգիրյանն էլ նկատեց, որ Կարեն Ճշմարիտյանը արդեն մի քանի անգամ պատգամավոր եղել է, ուստի ինքը հավանաբար նման վերլուծություն ունի, իսկ Ջհանգիրյանը դեռ մեկ տարի էլ չկա, որ պատգամավոր է ու նման ուսումնասիրություն չի արել:
ՀՀԿ-ական պատգամավոր Հովհաննես Սահակյանն իր ելույթում ասաց, որ ՀՀԿ-ն շահագրգիռ է եւ բոլոր հնարավորություններն օգտագործելու է՝ հարցն իրավական հարթության մեջ պահելու համար: Ի դեպ, հանձնաժողովը քաղաքական շահարկումներից ու քաղաքական բնույթի քննարկումներից զերծ պահելու կողմնակից էր նաև նախագծի հեղինակ, հիմնական զեկուցող Գագիկ Ջհանգիրյանը: «Ես շատ եմ ուզում, որ հանձնաժողովը հեռու մնա լարված իրավիճակներից»:
Կարդացեք նաև
Նելլի ԳՐԻԳՈՐՅԱՆ
