Գագիկ Եգանյան. «Հիմնվելով տեղեկատվության կասկածելի աղբյուրների վրա եւ ցանկալին ընդունելով իրականության փոխարեն` մարդիկ երբեմն կապում են ճամպրուկներն ու ճամփա ընկնում»:
Հայաստանից սկիզբ առնող անկանոն միգրացիայի կանխարգելմանն ու պոտենցիալ միգրանտների շրջանում իրազեկվածությունը բարձրացնելու թեմայով անցյալ տարվա հունվարի 31-ից այս տարվա հունվարի 31-ն ընկած ժամանակահատվածում մրցույթ էր հայտարարված: Այսօր «Անի» հյուրանոցում Ինֆորմացիայի ազատության կենտրոնն ամփոփեց մրցույթի արդյունքները: Ներկայացված են եղել հայաստանյան տպագիր, առցանց եւ էլեկտրոնային լրատվամիջոցներում հրապարակված շուրջ 50 լրագրողական հոդված, որոնցից հաղթող էին ճանաչվել 3 հրապարակում:
Hetq.am կայքում տպագրված լիպովցի հայ էմիգրանտների մասին հոդվածաշարի համար հոդվածաշարի հեղինակ Երանուհի Սողոյանը արժանացավ առաջին մրցանակին:
Երկրորդ տեղում «168 ժամ» թերթի լրագրող Լիլիթ Ավագյանի «Ավելորդը» հրապարակումն էր:
Կարդացեք նաև
«Հրապարակ» օրաթերթում տպագրված «Ցատկ Եվրոպայում կամ օտարության փորձությունը» հոդվածի հեղինակ Հասմիկ Բադալյանը վերցրեց երրորդ տեղի մրցանակը:
Հաղթողներին տրվեցին վկայագրեր եւ դրամական պարգեւներ: Առաջին տեղի համար` 1000 եվրոյին, երկրորդ տեղի համար` 500, երրորդ տեղի համար` 300 եվրոյին համարժեք դրամ:
«Հաճախ մարդիկ անօրինական միգրանտի կարգավիճակում հայտնվում են միգրացիայի տարբեր փուլերի վերաբերյալ իրազեկության պակասի արդյունքում: Հիմնվելով տեղեկատվության կասկածելի աղբյուրների վրա եւ ցանկալին ընդունելով իրականության փոխարեն` մարդիկ երբեմն կապում են ճամպրուկներն ու ճամփա ընկնում: Արդյունքում` օտարերկրյա պետություններում հայտնվելով առանց իրավական կարգավիճակի` նրանք խնդիրներ են ստեղծում ինչպես իրենց, այնպես էլ մուտքի երկրների եւ ինչու չէ նաեւ Հայաստանի համար»,-իր ելույթում նշեց մրցանակաբաշխությանը ներկա ՀՀ տարածքային նախարարության Միգրացիոն ծառայության պետ Գագիկ Եգանյանը: Ըստ նրա, մեր քաղաքացիների չափազանցված պատկերացումների վերանայման եւ նախքան մեկնելը հավաստի տեղեկտվությամբ նրանց ապահովելու համար Բելգիայի թագավորության ներքին գործերի նախարարությունը Միգրացոն պետական ծառայության եւ «Մարդկային զարգացման միջազգային կենտրոն» հ/կ-ի հետ իրականացնում է «Հայաստանից դեպի Բելգիա ուղղվող անկանոն միգրացիայի կանխարգելում` պոտենցիալ միգրանտների շրջանում իրազեկվածության բարձրացման միջոցով» ծրագիրը:
Լուսինե ԲՈՒԴԱՂՅԱՆ
