«Բոլորին, այդ թվում եւ Մոսկվային հասկանալի է, որ ՀՀ մասնակցության ցանկացած ֆորմատ հնարավոր է միայն այն դեպքում,երբ հաշվի առնվեն ՀՀ սպեցիֆիկ աշխարհագրական առանձնահատկությունները»
«Աբխազիայի նախագահի եւ գործող վարչապետի ներկա գտնվելը Մոսկվայում պատահական չէր»,- այսօր Մեդիա-կենտրոնում ասաց «Կովկաս» ինստիտուտի փոխտնօրեն Սերգեյ Մինասյանը՝ վերլուծելով Սերժ Սարգսյանի Մոսկվա կատարած այցը: Նա շեշտեց, որ աբխազական երկաթգծի գործարկման մեջ ամենալուրջ խնդիրը Մոսկվա-Թբիլիսի հարաբերություններն են:
Քաղաքագետի խոսքով, Հայաստանը ռուս-վրացական գործընթացում ակտիվ միջնորդական դեր է կատարում: Ինչ վերաբերում է նախագահի այցելության եւ Եվրասիական միության հետ կապված հարցին, Սերգեյ Մինասյանն ասաց, որ Եվրասիական միության գաղափարը դեռեւս շարունակում է մնալ որպես գաղափար, իսկ մեզ համար պրակտիկ նշանակություն կարող են ունենալ Մաքսային միության հետ կապված խնդիրները. «Բոլորին, այդ թվում եւ Մոսկվային հասկանալի է, որ ՀՀ մասնակցության ցանկացած ֆորմատ հնարավոր է միայն այն դեպքում, երբ հաշվի առնվեն ՀՀ սպեցիֆիկ աշխարհագրական առանձնահատկությունները: Հասկանալի է, որ չունենալով ուղղակի ցամաքային կապ` ՀՀ չի կարող նույն ֆորմատով համագործակցել , ասենք՝ ինչպես Բելառուսը կամ Ուկրաինան»:
Քաղաքագետի կարծիքով, նաեւ ՀՀ-ի մասնակցությունը այս կառույցին Մոսկվայի համար երկրորդական նշանակություն ունի, քան, ասենք, Ուկրաինայի դեպքում է: Քաղաքագետն այն կարծիքին է, որ Հայաստանի կողմից վարվող կոմպլեմենտար քաղաքականությունը մանեւրելու հնարավորություն է տալիս ու դա այդքան էլ վատ չէ:
Կարդացեք նաև
Նելլի ԳՐԻԳՈՐՅԱՆ
