Ոստիկաններն ու «Ժառանգության» անդամները եկան փոխհամաձայնության
Քիչ առաջ ավարտվեց «Ժառանգության» ներկայացուցիչների եւ փոխոստիկանապետ Վալերի Օսիպյանի ու փոխգնդապետ Կարեն Մովսիսյանի միջեւ բանակցությունները:
Հիշեցնենք, որ նրանք Ազատության հրապարակի կանաչապատ տարածքում Րաֆֆի Հովհաննիսյանի համար վրան տեղադրելու շուրջ բախումների էին գնացել: Հետո առանձնացան եւ որոշեցին մի լուծում տալ խնդրին:
Բանակցություններից հետո ոստիկաններն իրենք իրենցով առանձնացան եւ քննարկում էին խնդիրը, ժառանգականներն էլ՝ առանձին:
Կարդացեք նաև
Լսելի էր, որ վրանի տեղադրման շուրջ հակասություն կար «Ժառանգության» անդամների միջեւ, մի մասը գտնում էր, որ չպետք է թույլ տան, որ ոստիկանները կամայական մեկնաբանեն օրենքը, պետք է անհապաղ տեղադրեն վրանը, մյուս մասը, օրինակ՝ Ռուբիկ Հակոբյանը վստահեցնում էր, որ պետք չէ մարդկանց տանել ընդհարման եւ ավելի լավ է մի հատ էլ կանաչապատ տարածքում վրան տեղադրելու համար դիմեն քաղաքապետարանին: Ի վերջո, «Ժառանգության» անդամները որոշեցին դիմել քաղաքապետարան:
Փոխգնդապետ Կարեն Մովսիսյանը լրագրողների հետ զրույցում ասաց, որ «Ժառանգության» ներկայացուցիչները հենց այդպես էլ նախնական պայմանավորվեցին իրենց հետ: Նրա խոսքերով՝ հակառակ դեպքում քաղաքացիների մտքով կարող է անցնել նույն կանաչապատ տարածքում բուրդ չփխել կամ բարձերը արեւին տալ եւ իրենք չեն կարող արգելել: Այնպես որ, չպետք է օրենքը սելեկտիվ կիրառեն:
Հռիփսիմե ՋԵԲԵՋՅԱՆ
