Դանակահարած զինվորը դատապարտվեց չորսուկես տարվա ազատազրկման
Ժամկետային զինծառայող, Երեւան քաղաքի բնակիչ, 1993թ. ծնված Հովհաննես Մելիքսեթյանին մեղադրանք է առաջադրվել, որ նա լինելով զորամասի կապի հանգույցում որպես ռադիոհաղորդավար, 2012թ. հոկտեմբերի 15-ին ռադիորսման կետում այդ կետի ավագ, պայմանագրային զինծառայող Արմեն Դավիդովի հետ հացկերույթի ընթացքում, ոգելից խմիչք օգտագործելուց հետո, փաստացի ստորադասության հարաբերությունների բացակայության պայմաններում խախտելով զինծառայողների փոխհարաբերությունների կանոնագրքային կանոնները՝ իր երդմանը չհավատալու պատճառով 2-3 անգամ հարվածել է Դավիդովի դեմքին, ապա դանակով հարվածել նրա ձախ կրծքավանդակին եւ ձախ ոտքին, ինչը ծանր հետեւանքներ է առաջացրել: Պայմանագրային զինծառայող, Տավուշի մարզի Այրում քաղաքի բնակիչ, 1971թ. ծնված Արմեն Դավիդովին մեղադրանք է առաջադրվել, որ նա լինելով զորամասի ռադիորսման կետի թարգմանիչ, այդ կետի ավագ, խախտել է մարտական ծառայության կրման կանոնները, պարբերաբար թողել է ռադիորսման կետի տարածքը, գնացել մոտակա Արծվաբերդ գյուղ: Ա. Դավիդովի պարբերական եւ տեւական ինքնակամ բացակայությունների պատճառով ՀՀ անվտանգությանը վնաս պատճառելու սպառնալիք է ստեղծել: Ա. Դավիդովի նկատմամբ խափանման միջոց է ընտրվել չհեռանալու մասին ստորագրությունը, Հ. Մելիքսեթյանը կալանավորված է: Մարտի 13-ին Իջեւանում, Տավուշի մարզի առաջին ատյանի դատարանում գործով մեղադրողը՝ Լոռու կայազորի զինվորական դատախազության ավագ դատախազ Մարտուն Հախվերդյանը պահանջեց Հ. Մելիքսեթյանին դատապարտել 5 տարի 3 ամսվա ազատազրկման, իսկ Ա. Դավիդովին՝ 1 տարի պահել կարգապահական գումարտակում: Դատավոր Ռաֆիկ Մելքոնյանը վճռեց Հ. Մելիքսեթյանին ՀՀ քրեական օրենսգրքի 359 հոդվածի 3-րդ մասով («Զինծառայողների փոխհարաբերությունների կանոնագրքային կանոնները խախտելը նրանց միջեւ ստորադասության հարաբերությունների բացակայության դեպքում») դատապարտել 4 տարի եւ 6 ամսվա ազատազրկման, իսկ Ա. Դավիդովին ՀՀ քրեական օրենսգրքի 365 հոդվածի 1-ին մասով («Մարտական հերթապահություն կամ մարտական ծառայություն կրելու կանոնները խախտելը») դատապարտել մեկ տարվա պայմանական ազատազրկման: Ծագումով Ադրբեջանի Վարդաշենի շրջանից Ա. Դավիդովը «Առավոտի» թղթակցին ներկայացրեց դեպքի հանգամանքները: Հրամանատարությանը հայտնի է դարձել, որ ռադիորսման կետում ադրբեջաներենի թարգմանիչ աշխատող Ա. Դավիդովն օգտագործում է զինվոր Հ. Մելիքսեթյանի ծխախոտները: Վերջինս էլ որպեսզի ամոթով չմնա, զինվոր Մելիքսեթյանին առաջարկել է նրա համար «Դավիդով» տեսակի ծխախոտ գնել, ապա դրա համար գումար է տվել նրան: Տրված գումարի չափի (1000, թե՞ 2000 դրամ) մասին Հ. Մելիքսեթյանի երդումին չհավատալու համար վերջինս հացկերույթի ժամանակ դանակահարել է Ա. Դավիդովին:
Ոսկան ՍԱՐԳՍՅԱՆ
