Ռամիլ Սաֆարովի գործի մասին ՆԱՏՕ-ի գլխավոր քարտուղար Անդերս Ֆոգ Ռասմուսենն արձագանքել է, որովհետև կան մարդիկ, որոնք սխալմամբ այն կապում են ՆԱՏՕ-ի հետ. այսպիսի կարծիք հայտնեց ՆԱՏՕ/ԳՀԽ Հարավ Կովկասյան կապերի սպա Վիլյամ Լահուն՝ Վրաստանի հանրային կապերի ինստիտուտի ուսանողների հետ օրերս տեղի ունեցած հանդիպման ժամանակ:
«Այդ դեպքը (սպանությունը) տեղի է ունեցել Հունգարիայի դասընթացների ժամանակ, այդ դասընթացները Հունգարիայում են, կազմակերպում են հունգարացիները՝ Հունգարիայի բանակը, սակայն ՆԱՏՕ-ն հաստատել էր դասընթացները՝ իր ծրագրերն իրականացնելու համար: Դա սարսափելի դեպք էր, ողբերգական դեպք, և ոչ մի ներում չկա դրան… Սակայն սրանք որոշումներ են (Սաֆարովի արտահանձնման և ներում շնորհելու դեմ քայլեր ձեռնարկելը), որոնք առանձին պետությունները պետք է կայացնեն: ՆԱՏՕ-ն չունի ազդեցություն, և սա ՆԱՏՕ-ի գործը չէ», – ասաց Լահուն՝ ավելացնելով, թե ցավալի է, որ մարդիկ այս խնդիրը ասոցացնում են ՆԱՏՕ-ի հետ:
Խոսելով ՆԱՏՕ-ի հետ համագործակցության շրջանակներում ադրբեջանական բանակում տեղի ունեցող փոփոխությունների մասին` Լահուն նշեց, որ բազմաթիվ սպաներ են վերապատրաստվում արտասահմանում, և նրանք աշխատում են իրենց հայեցակարգը փոփոխելու ուղղությամբ. «Բայց սահմանափակումներ կան (հայեցակարգային փոփոխությունների), նույնը՝ Հայաստանի պարագայում: Սահմանափակումները կապված են այն բանի հետ, թե ինչ փոփոխություններ են նրանք ուզում անել», – նա ասաց, որ այդ սահմանափակումների պատճառը երկու երկրների միջև հակամարտությունն է:
ՆԱՏՕ-ի վարժանքների շրջանակներում նա Հարավային Կովկասում հանդիպել է սպաների, որոնք անգլերեն են խոսում, որոնք «գիտեն ինչպես քայլել ՆԱՏՕ-ին համընթաց» և որոնք «գիտեն ու հասկանում են՝ ինչպես է գործում արևմտյան հայեցակարգը». «Ավելի ու ավելի շատ բանակի սպաներ և քաղաքացիականներ են կրթվում Արևմուտքում, ինչը փոխում է այդ մարդկանց մտածելակերպը և, ըստ ՆԱՏՕ-ի տեսակետի, այն նրանց դարձնում է ավելի բաց և ավելի արդյունավետ: Ես տեսնում եմ այս փոփոխությունները բոլոր (հարավկովկասյան) երկրներում»:
Կարդացեք նաև
Ըստ Լահուի՝ Վրաստանի նոր կառավարությունը չի փոխել ՆԱՏՕ-ի հետ հարաբերությունների ուղղությունը. «Եթե ուշադրություն դարձնենք արմատական հարաբերություններին և հարաբերությունների ուղղությանը, ապա չկա փոփոխություն, ոչ մի ընդհատում՝ նրա մասնակցած որևէ ծրագրում, ոչ մի փոփոխություն չի եղել Եվրոատլանտյան ինտեգրման ցանկության մեջ: Եղել է վերակազմավորում, արդեն փոփոխություններ են կատարվում պաշտպանության նախարարությունում, որը մեր տեսակետից չափազանց դրական է», – ասաց Լահուն՝ Վրաստանում ՆԱՏՕ-ի կապերի գրասենյակի ղեկավարը, և նշեց, որ Վրաստանի անդամակցությունը ՆԱՏՕ-ին միայն ժամանակի հարց է:
Հովհաննես ԻՇԽԱՆՅԱՆ
Լուսանկարում՝ ձախից Վիլյամ Լահու, աջից՝ ՎՀԿԻ ուսանող:
