Մեղադրողը մնացածների համար պահանջեց 2-4 տարվա ազատազրկում:
Մարտի 13-ին Տավուշի մարզի առաջին ատյանի դատարանում շարունակվեց պայմանագրային զինծառայող, լեյտենանտ Արտակ Նազարյանի մահվան գործով դատավարությունը:
Նիստում մեղադրողներ Հայկ Հարոյանը եւ Հարություն Հարությունյանը հանդես եկան շուրջ 60 էջ կազմող մեղադրական ճառով: Մեղադրողների ճառի հիմնական բովանդակությունն այն էր, որ ԵՊՀ արեւելագիտության ֆակուլտետն ավարտած Արտակ Նազարյանը, հիմնական աշխատանք չունենալով, դարձել է պայմանագրային զինծառայող: Ծառայակիցները նրան բնութագրել են որպես բարի, կարեկից անձնավորության, որը սակայն դասակի հրամանատարի, հենակետի ավագի իր աշխատանքում թերություններ է ունեցել:
Կարդացեք նաև
Համաձայն մեղադրանքի` Վազգեն Սարգսյանի անվան ռազմական ինստիտուտն ավարտած, գումարտակի հրամանատարի տեղակալ, կապիտան Հակոբ Մանուկանը հակակրանք է տածել Ա. Նազարյանի հանդեպ, նսեմացրել նրա արժապատվությունը: Ընդ որում` դա արել է զինվորների աչքի առաջ: Հակոբ Մանուկյանը տարբեր առիթներով մի քանի անգամ կռվի է բռնվել Արտակ Նազարյանի հետ, հարվածներ հասցրել նրան:
Առաջադրված մեղադրանքի համաձայն՝ Նազարյանին նսեմացրել, հարվածել են նաեւ հարեւան հենակետի ավագ, լեյտենանտ Վահագն Հայրապետյանը եւ Արտակ Նազարյանի ենթակա ժամկետային զինծառայողներ Մխիթար Մխիթարյանը, Հարութիկ Կիրակոսյանը,Ադիբեկ Հովհաննիսյանը:
Մեղադրողները հայտարարեցին, որ Արտակ Նազարյանը, ունենալով ներփակ բնավորություն եւ չկարողանալով հաշտվել իր իդեալների խորտակման հետ, դիմել է ինքնասպանության:
Արտակ Նազարյանի հարազատները ցուցմունք էին տվել, որ Նազարյանը, լինելով հավատացյալ, չէր կարող ինքնասպանություն գործել: Մեղադրողներն իրենց ճառում պահանջեցին քրեական օրենսգրքի մի շարք հոդվածների համակցությամբ կապիտան Հակոբ Մանուկյանին դատապարտել 13, լեյտենանտ Վահագն Հայրապետյանին, ժամկետային զինծառայողներ Ադիբեկ Հովհաննիսյանին,Մխիթար Մխիթարյանին՝ 4-ական տարվա, իսկ ժամկետային զինծառայող, ներկայումս զորացրված Հարութիկ Կիրակոսյանին` 2 տարվա ազատազրկման:
Հակոբ Մանուկյանի պաշտպան Հրանտ Գեւորգյանը մեղադրողների ճառը համարեց «հանճարեղ» եւ դրա ավարտից հետո, որպես հեգնանքի նշան, ծափ տվեց: Դատական հաջորդ նիստը նշանակված է մարտի 26-ին:
Ոսկան ՍԱՐԳՍՅԱՆ
