Պահուստավորվեք ավազի պարկերով, թանկարժեք իրերն էլ բարձր տեղերում դրեք:
Պետք է միշտ պատրաստ ունենալ աղետի կապոց, եթե ունեք թանկարժեք իրեր, ապա դրանք բարձր տեղերում դրեք, ինչ գույք ուենք, որը ջուրը կարող է քշել-տանել`ամրացրեք, կապեք, իսկ այն գյուղացիներն էլ, որոնք գետերին մոտ տարածքներում գյուղատնտեսական նպատակներով թունաքիմիկատներ ունեն պահած, ապա դրանք էլ պետք է հեռացնեն եւ անպայման ավազով լցված պարկերով պետք է պահուստավորվել, որպեսզի տուն մուտք գործող ջրի դեմն առնվի: Առաջիկա օրերին սպասվող հնարավոր ջրհեղեղների աղետալի հետեւանքներից խուսափելու համար հատկապես գետերի ափամերձ տարածքներում բնակվողներին նման խորհուրդ տվեց արտակարգ իրավիճկաների նախարարության, բնակչության պաշտպանության, աղետների հետեւանքների վերացման կազմակերպման վարչության պետ Հովհաննես Եմիշյանը:
Այսօր ԱԻՆ ճգնաժամային կառավարման կենտրոնում լրագորղների հետ հանդիպման ժամանակ պարոն Եմիշյանն ասաց, որ ջրհեղեղներ եղել են նաեւ 2003-2004 թվականին. «2003-ին էլ են եղել եւ ընդհանուր վնասը մոտ 7200 դոլարի սահմաններում էր, իսկ 2004-ին` ավելի մեծ, մոտ 1,5 միլիարդ դրամի»:
Կարդացեք նաև
Հիշեցնենք, որ այսօր ԱԻՆ-ը տեղեկացրել է այն մասին, որ մարտի 18-ին սպասվում են առատ տեղումներ, իսկ ջերմաստիճանի կտրուկ բարձրացումն էլ` 8-10 աստիճան, եւ կիսահալված վիճակում գտնվող ձյան հալոցքն էլ հնարավոր է հանգեցնի հանրապետության մի շարք բնակավայրերում ջրածածկերի, չի բացառվում նաեւ, որ սողանքներն ակտիվանան:
Պարոն Եմիշյանի խոսքերով` չի կարելի ասել, որ այս անգամ վնաս ավելի շատ կլինի, որովհետեւ այս անգամ, ի տարբերություն նախորդ դեպքերի, կանխարգելիչ միջոցառումներն արդեն սկսվել են, եւ տարբեր ոլորտների հետ համակարգված աշխատում են:
Իսկ հիմնական միջոցառումները` գետերի հուների եւ սելավատարերի մաքրումն է: ԱԻՆ հիդրոմետ ծառայության օդերեւույթաբանության կենտրոնի պետի տեղակալ Գագիկ Սուրենյանի ներկայացմամբ էլ առաջիկա օրերին՝ մինչեւ մարտի 18-ը ներառյալ, Լոռիում, Տավուշում, Գեղարքունիքում եւ Սյունիքում սպասվում են բավականին ուժեղ, վտանգավորության աստիճանի քամիներ`30-35 մետր վայրկյան արագությամբ, իսկ այսօր արդեն Սյունքիում կան պոկված տանիքներ. «Եղանակի կտրուկ ջերմացման հետ միասին հնարավոր են քամու պոռթկումներ, որոնք վնաս կարող են հասցնել»:
Նելլի ԲԱԲԱՅԱՆ
