Սյունիքի մարզում դեռեւս երեկ ուշ երեկոյան սկսած ուժեղ քամին չի դադարել նաեւ այսօրվա ընթացքում: Ուժեղ քամու հետեւանքով մարզի մի շարք համայնքներում ավերածություններ են եղել, անհատական տների, անասնագոմերի, դպրոցների եւ համայնքային սեփականության շենքերի տանիքներ վնասվել, մի շարք գյուղեր էլ ուժգին քամու պատճառով հոսանքազրկվել են: 2 ժամից ավելի է հոսանքազրկված են Կապանի տարածաշրջանի Վերին Խոտանան եւ ենթաշրջանի այլ գյուղեր:
Վ. Խոտանանի գյուղապետ Կարեն Հակոբյանի խոսքով` նման ուժգնությամբ քամի իրենց մոտ գրանցվել է նաեւ մի քանի տարի առաջ, երբ գյուղին հասցված վնասները կրկին մեծ են եղել: «Քամու հետեւանքով այս պահին էլ ավերածությունները շարունակվում են մեր գյուղում, վնասները մեծ են. գյուղապետարանի, կենցաղի, ակումբի շենքերի տանիքներ են մասնակի վնասվել, քանդվել են նաեւ բնակիչների տների, անասնագոմերի տանիքները: Վաղն աշխատանքային խումբը տեղում կուսումնասիրի եւ կհաշվարկի քամու հասցրած վնասների չափերը, որից հետո այն կներկայացնենք Սյունիքի մարզպետարան», – ասաց գյուղապետը:
Իսկ Նորաշենիկ գյուղում առավել շատ տուժել է գյուղական դպրոցի շենքի տանիքը, քամու ավերածություններից անմասն չեն մնացել նաեւ Չափնի, Վանեք գյուղերը, որտեղ քամին կրկին պոկել-տարել է գյուղացիների առանձնատների ու անասնագոմերի տանիքները:
Կարդացեք նաև
Քամուց տուժել են նաեւ Գորիսի տարածաշրջանի մի շարք գյուղեր: Խնձորեսկում ուժեղ քամուց ոչ միայն քանդվել է գյուղական դպրոցի շենքի տանիքը, այլեւ ջարդվել-փշրվել են կրթօջախի լուամուտները: Խնձորեսկի գյուղապետ Սերյոժա Հայրապետյանի փոխանցմամբ` մարդկային տուժածներ բարեբախտաբար չկան եւ բնակիչներին խորհուրդ է տրվել մնալ տներում` միչեւ քամու հանդարտվելը: «Նման ուժգնությամբ քամի ես չեմ հիշում վերջին անգամ, երբ է եղել մեր գյուղում: Այս պահին մարդիկ նույնիսկ չեն կարողանում բարձրանալ իրենց տների տանիքները կարգի բերեն, հնարավոր չի ուժեղ քամու առկայությամբ գործ անել: Անասնագոմերն ու անհատական տների տանիքներն են մասնակի քանդվել, գյուղի դպրոցի տանիքի մյուս մասն էլ է արդեն քամուց սկսում քանդվել: Բացի այդ, գյուղն օրվա ընթացքում մոտ 20 անգամ հոսանքազրկվել է»,-տեղեկացնում է համայնքի ղեկավար պարոն Հայրապետյանը:
Առանց հոսանքի է մնացել անեւ Գորիսի Հարթաշեն գյուղը: Գյուղապետ Գագիկ Վանեսյանը նշեց, որ այստեղ ուժեղ քամի եղել է նաեւ 2 օր առաջ, իսկ երեկ գիշերվանից սկսած քամին գյուղում դեռ չի հանդարտվել: Համայնքում այս պահին գրեթե շարժ չկա, մարդիկ նախընտրում են տներից դուրս չգալ, իսկ 3-4 ընտանիքներ արդեն իսկ բարձրաձայնել են իրենց տների տանիքներին հասցված վնասների մասին:
Ուժեղ քամու պատճառած վնասների վերաբերյալ ահազանգեր է ստացել նաեւ Սյունիքի մարզի փրկարարական ծառայությունը: Ըստ կառույցի տրամադրած տվյալների` վնասվել է Կապանի թիվ 13 դպրոցը սնուցող գազատարը, ուժեղ քամուց վնասվել են Սյունիքի մարզի Կապան քաղաքի Շինարարների փողոցի թիվ 3 շենքի եւ Գորիս քաղաքի Անկախության փողոցի թիվ 2 շենքի տանիքների թիթեղները: Դեպքի վայր է մեկնել մեկ մարտական հաշվարկ:
Հրշեջ-փրկարարները իրականացրել են տանիքի թիթեղների ամրացման աշխատանքներ: Վնասվել է Սյունիքի մարզի Գորիս քաղաքի թիվ 1 մանկապարտեզի տանիքը: Գորիս-Երևան ավտոճանապարհի 5-րդ կմ-ի վրա ուժեղ քամուց էլեկտրասյուն է թեքվել, իսկ լարերը պոկվել և ընկել են ճանապարհի երթևեկելի հատվածի վրա:
Կապանում ժամանակ առ ժամանակ ուժգնացող քամուց վնասվել եւ այս պահին էլ դեռ շարունակվում են վնասվել քաղաքում աճեցված ծառերը, շենքերի տանիքները, ապակիները եւ այլն:
Մերի ՍՈՂՈՄՈՆՅԱՆ
