Սահմանադրական դատարանում ՀՀ նախագահի թեկնածուներ Րաֆֆի Հովհաննիսյանի եւ Անդրիաս Ղուկասյանի դիմումների քննության կապակցությամբ ընթացած դատական նիստում լսվեցին հարակից պատասխանողների՝ ՀՀ գլխավոր դատախազության եւ ՀՀ ոստիկանության բացատրությունները: Դատարանը լսեց դիմումատու կողմերի միջնորդությունները:
Ր. Հովհաննիսյանի ներկայացուցիչները հանդես եկան 10 միջնորդություններով Անդրիաս Ղուկասյանը՝ 1 միջնորդությամբ:
Ր. Հովհաննիսյանի ներկայացուցիչ Կարեն Մեժլումյանը միջնորդեց կասեցնել այս գործի քննությունը, քանի որ, ըստ նրա, Սահմանադրական դատարանում կա մեկ այլ դիմում՝ կապված Րաֆֆի Հովհաննիսյանի կողմից վարչական դատարանի փետրվարի 4-ի դատական ակտի սահմանադրականության հարցի հետ:
Մեժլումյանը միջնորդեց դատարան հրավիրել դիտորդ Նարինե Իսմայիլին՝ որպես վկա: Մեկ այլ միջնորդություն կապված էր ԿԸՀ-ի աշխատակազմի իրավաբանական վարչության պետ Նունե Հովհաննիսյանին որպես վկա ներգրավելու հետ, քանի որ, ըստ նրա, տիկին Հովհաննիսյանը ընտրատեղամասային ընտրական հանձնաժողովներին էլեկտրոնային փոստով նամակներ է ուղարկել՝ Ր. Հովհաննիսյանի դիմումների մերժման պահանջով: Այդ մասին տեղեկացրել է ԱԺ նախկին պատգամավոր Ստեփան Սաֆարյանը, որին որպես վկա դատակոչելու միջնորդությամբ հանդես եկավ:
Ր. Հովհաննիսյանի ներկայացուցիչ Զարուհի Փոստանջյանը նկարներ տրամադրեց դատարանին, որտեղ պատկերված էին, թե ինչպես են զինվորները տեղամասերում ցուցակներով քվեարկում:
Փոստանջյանը միջնորդեց, որ 1988 պարկերը դատարան բերվեն, որպեսզի տեսնեն, թե ինչ կա պարկերի ներսում: Միեւնույն ժամանակ նա միջնորդեց, որ դատարանը որպես վկա կանչի Սերժ Սարգսյանին: Այս միջնորդությանը հետեւեց ՍԴ նախագահի ռեպլիկը. «Տպավորությունն այնպիսին է, որ Սերժ Թանկյանին էլ կհրավիրենք»:
Միջնորդություններից մեկը վերաբերում էր ԱԱԾ-ի կողմից Հայաստանի Հանրապետություն մուտք ու ելք արած քաղաքացիների վերջին 5 տարիների թվին: Անդրիաս Ղուկասյանը դիմեց դատարանին, որ հնարավորության դեպքում դատարան ներկայացնեն 576 տեղամասերում բացակա քաղաքացիների քանակը:
Ռուզան ՄԻՆԱՍՅԱՆ
