Այսօր Ազատության հրապարակում լրագրողների հետ ճեպազրույցում ՀԱԿ խմբակցության պատգամավոր Նիկոլ Փաշինյանը հարցին՝ Ձեր կարծիքով զիջումների կգնա՞ն իշխանությունները՝ պատասխանեց, որ իրեն դա շատ քիչ է հետաքրքրում. «Ինձ ավելի շատ հետաքրքրում է, թե ինչ կանեն քաղաքացիները»: Իսկ թե ունի՞ խիղճ իշխանությունը եւ այդ խիղճը կշարժվի՞՝ նա պատասխանեց. «Իշխանության մասին իմ գնահատականները կարծում եմ հանրամատչելի են եւ հանրահայտ: Չեմ կարծում, որ ես որեւէ բան պակաս եմ ասել, որ հիմա այդ պակասը լրացնելու անհրաժեշտություն կա»:
Ինչ վերաբերում է անուղղակի հնչող առաջարկներին, ընդդիմությանը պաշտոններ տալուն՝ նրա խոսքերով՝ «Պաշտոններ կարող է տալ ընտրված նախագահը, իսկ ապօրինի իշխանությունը չի կարող դա անել»:
Մեր դիտարկմանը, որ Ահարոն Ադիբեկյանն ասում էր, որ հացադուլը թուլության նշան է եւ հուսահատության քայլ, համաձա՞յն եք՝ Նիկոլ Փաշինյանն ի պատասխան ասաց. «Ահարոն Ադիբեկյանը փոխե՞լ է մասնագիտությունը, մինչեւ հիմի թվեր էր հրապարակում»:
Թե ինչ կարծիք ունի «Հանրապետություն» կուսակցության նախագահ Արամ Սարգսյանի առաջարկած քայլերի մասին՝ նա անդրադարձավ երրորդ կետին՝ ուրբաթ օրը հանրահավաքին հնարավորինս շատ մարդ հավաքելուն: Նրա խոսքերով՝ «Ես կարծում եմ, որ ուրբաթ օրվա հանրահավաքը տպավորիչ է լինելու»:
Կարդացեք նաև
Հարցին՝ ճի՞շտ եք համարում Րաֆֆի Հովհաննիսյանի՝ Գագիկ Ծառուկյանի հետ հանդիպման գնալը՝ նա պատասխանեց, որ ճիշտ ու սխալ չկա. «Նախագահի թեկնածուն այս դեպքում որոշակի քայլեր, հանդիպումներ է ձեռնարկել, բայց նաեւ համաձայն եմ այն գնահատականների հետ, ըստ որոնց, նմանատիպ հանդիպումներն ավելի շատ հարցեր են առաջացնում, քան թե պատասխաններ»:
Հռիփսիմե ՋԵԲԵՋՅԱՆ
ադիբեկյանի պահը վերջն էր