Այսօր Րաֆֆի Հովհաննիսյանի հետ Ազատության հրապարակում էր ՀԱԿ խմբակցության պատգամավոր Նիկոլ Փաշինյանը:
Aravot.am-ը նրանից լրագրողների հետ զրույցում հետաքրքրվեց՝ Դուք էլ եք ընդդիմադիր պատգամավոր, վերջին օրերին շատ է խոսվում մանդատները վայր դնելու մասին, պատրա՞ստ եք ինքներդ դա անել եւ իմաստ տեսնո՞ւմ եք դրա մեջ: Նա պատասխանեց. «Առաջարկը քննարկելի եմ համարում: Հենց հիմա Ազատության հրապարակում տեղի ունեցող գործընթացի ամենակարեւոր իմաստն այն է, որ պետք է մտքեր հնչեն, առաջարկներ հնչեն, քննարկվեն: Դրա համար ես այդ համատեքստում եմ դիտարկում խնդիրը»:
Մեր հարցին՝ Ձեր՝ ստվերային կառավարություն ստեղծելու առաջարկին ընթացք չտրվեց, Դուք հիմա պնդո՞ւմ եք, որ դրա անհրաժեշտությունը կա, թե՞ չէ: Նա պատասխանեց, որ համաձայն չէ այդ գնահատականի հետ եւ առաջիկայում դրա հետ կապված ինչ-որ մտքեր կհնչեն:
Այսօր Նիկոլ Փաշինյանը շուրջ 20 րոպե զրուցեց Րաֆֆի Հովհաննիսյանի հետ: Նրանք թեժ քննարկում էին ինչ-որ հարցեր: Մենք հետաքրքրվեցինք, թե կոնկրետ ի՞նչ հարց էին այդպես բուռն քննարկում: Նիկոլ Փաշինյանը պատասխանեց՝ «Ընթացիկ հարցեր, Րաֆֆի Հովհաննիսյանի ինքնազգացողության մասին»: Մեր զարմանքին, որ այդքան երկար՝ ինքնազգացողության հա՞րցն էին շոշափում՝ Նիկոլ Փաշինյանը մանրամասնեց, որ քննարկվել են նաեւ առաջիկա հանրահավաքի հետ կապված հարցեր, ծրագրեր:
Կարդացեք նաև
Պե՞տք էր, թե պետք չէր հացադուլը, ըստ պարոն Փաշինյանի, այն արդեն հայտարարված է եւ կոռեկտ չեն այդ խոսակցությունները:
Նա հայտարարեց նաեւ, որ ապրիլի 9-ին երդմնակալություն անպայման կլինի, բայց թե ում երդմնակալությունը՝ «այ դա կտեսնեք», ասաց պարոն Փաշինյանը:
Հռիփսիմե ՋԵԲԵՋՅԱՆ
Ր.Հովհաննիսյանը և Ն.Փաշինյանը առաջիկա 5 տարում լինելու են Հայաստանի քաղաքական դաշտը ձևավորող 2 դեմքերը: Չեմ զարմանա,որ (մոտ) ապագայում Ն.Փաշինյանը միանա/միավորվի «Ժառանգությանը»: