Ցմահ ազատազրկման դատապարտված Մանուկ Սեմերջյանի մահվան հանգամանքների վերաբերյալ ՀՀ ոստիկանության Երևանի Էրեբունիի բաժնում անցկացված հետաքննության արդյունքում որոշվել է մերժել քրեական գործի հարուցումը: Ինչպես «Փաստինֆո»-ի թղթակցին հայտնեցին ՀՀ ոստիկանության հասարակայնության հետ կապերի և լրատվության վարչությունից, հիշյալ որոշումն ընդունվել է ՀՀ քրեական դատավարության օրենսգրքի 35-րդ 1-ին մասի 1-ին կետի, այն է՝ հանցագործության դեպքի բացակայության հիմքով:
Դիտավորյալ սպանության համար ցմահ ազատազրկման դատապարտված և արդեն 21 տարի անազատության մեջ գտնվող դատապարտյալն ունեցել էր խնդիրներ ստամոքսի ու աղիների հետ կապված, նախկինում 4 անգամ վիրահատվել էր: «Արթիկ» ուղղիչ հիմնարկից նրան նախ տեղափոխել էին «Դատապարտյալների հիվանդանոց», ապա «Էրեբունի» բժշկական կենտրոն, որտեղ վիրահատությունից հետո անցյալ տարվա դեկտեմբերի 31-ին մահացել էր:
