«Խոշտանգումը ամենանողկալի հանցագործություններից մեկն է: Խոշտանգումը ավելի մեծ հանցանք է, քան մանր կամ նույնիսկ խոշոր գողությունը: Այս հանցանքը ավելի քան առկա է մեր հասարակության մեջ: Շատերը պարզապես չգիտեն դրա առկայության մասին, մյուսները փորձում են անտեսել այն»,-ասում է «Քաղաքացիական հասարակության ինստիուտի» նախագահ Արման Դանիելյանը՝ մեր երկրում ազատազրկման դատապարտված անչափահասների հանդեպ դաժան վերաբերմունքի եւ խոշտանգումների ուսումնասիրությանը նվիրված այսօր «Անի Պլազա» հյուրանոցում տեղի ունեցած ասուլիսին:
Հայաստանում ՄԱԿ-ի մանկական հիմնադրամի ներկայացուցիչ Հենրիետ Արենսը կարծում է, որ ազատազրկման մեջ գտնվող անչափահասների իրավունքները մեր երկրում շատ սահմանափակված եւ ոտնահարված են.
«Կատարված ուսումնասիրությունը ցույց է տալիս, որ անչափահասների հանդեպ կիրառվում է ֆիզիկական ուժ: Սա վերաբերում է ոչ միայն մեղադրյալներին, այլ նաեւ կասկածյալներին, որոնք կարող են իրականում անմեղ լինել: Ես կարծում եմ, որ անչափահասների շրջանում հանցանքների իրականացումը եւ դրանց համար պատիժ սահմանող արդարադատական համակարգը լուրջ փոփոխությունների կարիք ունի եւ չի համապատասխանում եվրոպական չափանիշներին: Այս ոլորտը համակարգելու եւ վիճակը այստեղ բարելավելու համար կարեւոր են ոչ միայն օրինապահ մարմինների, այլեւ դատավորների, հոգեբանների, անչափահասների ընտանիքների հետ տարվող աշխատանքները»:
ՀՀ արդարադատության նախարարի տեղակալ Արամ Օրբելյանի խոսքերով, նման ուսումնասիրությունները հնարավորություն են տալիս ի հայտ բերել առկա խնդիրները եւ լուծում տալ դրանց. «Ես ողջունում եմ նման ուսումնասիրությունները, քանի որ դրանք հնարավորություն են տալիս կողքից, դիտորդի աչքով տեսնել ոլորտում առկա խնդիրները եւ հնարավորինս շուտ լուծում տալ դրանց: ՀՀ արդարադատության նախարարությունը անչափահասների գաղութներում բռնության դեմ պայքարի խնդրի լուծման հարցում համագործակցում է ՄԱԿ-ի հետ եւ հաշվի կառնվեն ուսումնասիրության արդյունքում առաջացած խնդիրները: Այս հարցը ընդգրկվել է նաեւ Հայաստանի 2012-2016 թթ. դատական բարեփոխումների ծրագրում»:
Կարդացեք նաև
Կատարված ուսումնասիրությունը ցույց է տալիս, որ 82 անչափահասներից 21 %-ն իրազեկված չեն եղել ձերբակալման պատճառների մասին, 42 %-ն առանց կարդալու է ստորագրել ձերբակալության արձանագրությունը, 31 %-ը խոստովանել է, որ իրենց երբեք չեն իրազեկել իրենց իրավունքների մասին, իսկ հարցաքննությունները մեծ մասամբ իրականացվել են առանց փաստաբանի ներկայության:
Աննա ԹԱՄԱՄՅԱՆ
