Մայր աթոռ Ս. Էջմիածնի միաբան, հայորդաց տների տեսուչ, տեր Կոմիտաս վարդապետ Հովնանյանն ասաց՝ պատրաստ չէ քաղաքական խնդիրների մասին խոսել, երբ հետաքրքրվեցինք, թե Րաֆֆի Հովհաննիսյանի հացադուլը երկրում իրավիճակ կփոխի՞:
Նրա խոսքերով, խղճի ազատության մասին օրենք գոյություն ունի. «Ամեն մեկն ազատ է իր պատկերացումն իրականացնել, եթե որեւէ մեկին իր գործընթացով չի վնասում: Եթե անձը մտածում է՝ այդկերպ իր տեսակետն ու բողոքը կարող է արտահայտել, ազատ է գործելու: Եկեղեցին ի՞նչ ասի, եկեղեցին ամեն ինչի պատասխանն արդյո՞ք պիտի կարողանա տալ, այն էլ այս օրերին, երբ եկեղեցու կարծիքն այնքան անկարեւոր է դարձել մարդկանց համար, եւ մարդիկ անում են, այն, ինչ ուզում են»:
Մեր հարցին, եկեղեցու հոգեւոր առաջնորդներից առաջիկայում կայցելե՞ն Րաֆֆի Հովհաննիսյանին զորակցելու կամ նրա հետ պարզապես զրուցելու, Տեր Կոմիտասն ասաց. «Ես գամ ու ասեմ՝ գիտեք ես եկել եմ ձեզ զորակցելու, ինչո՞վ դուք կտեսնեք իմ զորակցությունը: Ի՞նչ է նշանակում նստացույց, հացադուլ անող մարդուն զորակցել: Գնացողներն այդ մարդուն ավելի շատ խանգարում են, քան օգնում. ամեն մեկը ինչ-որ վայ վայ են ասում, ի՞նչ են փոխում: Թող ամեն մեկը պատասխանատվություն ունենա իր գործում կատարյալ լինելու մեջ, այդ ժամանակ օգնած կլինեն Րաֆֆին: Ամեն մեկը իր պաշտոնի մեջ պատասխանատվության գիտակցությունն ունենա… այլ կերպ չեմ պատկերացնում զորակցությունը»:
Տեր Կոմիտասն անդրադառնալով Ր. Հովհաննիսյանի արած ծայրահեղ հայտարարությանը, թե ապրիլի 9-ին Սերժ Սարգսյանը կերդվի իր դիակի վրա, ասաց. «Րաֆֆին արդեն գիտակից, խելացի մարդ է, ինքն է որոշում ինչն է ճիշտ իր համար»:
Կարդացեք նաև
Մեր հարցին՝ հնարավո՞ր է եկեղեցին օգնի՝ Սերժ Սարգսյանին ու Րաֆֆի Հովհաննիսյանին կոմպրոմիսի գալու հարցում, Տեր Կոմիտասն ասաց. «Կօգներ, եթե մեր պետության մեջ եկեղեցին ունենար իր զորավոր տեղը: Դժբախտաբար իր զորավոր տեղը չունի: Եթե այսօր եկեղեցին մի կոռուպտ, գող, ավազակ պաշտոնյայի գնա եւ ասի՝ ինչու ես այդպիսի բաներ անում, այդ անձը եկեղեցու պատասխանատուին այնքան հեռու կուղարկի, որ ինքն էլ կզարմանա, թե ինչպես դիմացի հայ մարդը հայ եկեղեցականի նկատմամբ նման կեցվածք կարող է ցուցաբերել» :
Արփինե ՍԻՄՈՆՅԱՆ
Իսկ, ըստ էության, ի՞նչ է նշանակում հացադուլ անել: Ենթադրում եմ, որ դա տարբերվում է ծոմ պահելուց:
Երբ ես փոքր երեխա էի ու ծնողներս ուզածս չէին, անում, հրաժարվում էի ընթիրքից: Այս իմաստով կարող եմ պարոն Հովհաննիսյանին հասկանալ:
Իսկ եթե հացադուլի նպատակը իր պահանջները չիրականացնելու դեպքում ինքնասպանություն գործելն է, ապա դա մարդասպանությանը համարժեք ու քրիստոնեական նորմերով դատապարտվաղ արարք է:
Տեր Կոմիտասը մեկնաբանում է միայն այսօրվա իրողությունը,՝ այսինքն հետևանքները, իսկ պատճառների մասին, չգիտես ինչու՛, չի ուզում անդրադառնալ:Չե՛ որ տասնհինգ տարի առաջ
պատկերը բոլորովին այլ է եղել: Ահա ինչի մասին է պետք խոսել, այն էլ մանրամասն:
Այսօրվա իրողությունը, յուրաքանչյուր նորմալ հայ մարդու հոգու խոր ցավն է: