Դրանց ստեղծման համար մեծ ֆինանսներ են ծախսվել
Վարկային, դրամաշնորհային եւ այլ ծրագրերի միջոցով Տավուշի մարզում ստեղծվել է կաթի հավաքման եւ վերամշակման շուրջ 20 ձեռնարկություն: Դրանց բացարձակ մեծամասնությունն այժմ անգործության է մատնված: Զանգահարեցինք մարզի տարբեր տարածքներում առկա կաթի ընդունման եւ վերամշակման ձեռնարկություններ:
«Էմուլիկ» կաթի սպառողական կոոպերատիվը գործում է Իջեւան քաղաքի մերձակա Գանձաքար գյուղում: Կոոպերատիվի տնօրեն Էմմա Հակոբյանի ամուսին Զարմայիլ Մարդանյանը, ով Գանձաքարի գյուղապետի տեղակալն է, ասաց, որ ներկայումս կոոպերատիվը շատ քիչ ծավալով է կաթ հավաքում, կաթի ընդունման գինը շատ թանկ է, լիտրը` 200 դրամ: Այս ձեռնարկությունն ամիսը 300-400 լ կաթ է ընդունում, դրանից մածուն պատրաստում: Զ. Մարդանյանի խոսքերով՝ իրենք հույս ունեն, որ գարնան սեզոնի հետ կավելացնեն կաթի ընդունման քանակը, նաեւ նպատակ ունեն օգտվել Համաշխարհային բանկի գյուղատնտեսական ծրագրերից:
Բերդի տարածաշրջանի սահմանամերձ Ներքին Կարմիրաղբյուր գյուղում գործում է «Վարդաշեն» կաթի սպառողական կոոպերատիվը: Ներքին Կարմիրաղբյուրի գյուղապետ Մանվել Կամենդատյանն ասաց, որ այն ստեղծվել է 3 տարի առաջ,կոոպերատիվն աշխատել է ընդամենը 15 օր, եւ փակվել, որովհետեւ լիտրը 250 դրամով կաթ հավաքելը տնտեսապես ձեռնտու չէ:
Կարդացեք նաև
Տարբեր ծրագրերով կաթի ընդունման կետեր են ստեղծվել Բերդի տարածաշրջանի Նավուր, Վարագավան, Նորաշեն,Տավուշ գյուղերում, սակայն դրանք բոլորն էլ անգործության են մատնված:
Նոյեմբերյան քաղաքում գործում է «Արշալույս Իսրայելյան» ՍՊԸ-ն, որը ֆերմերներից հավաքած կաթից պանիր է պատրաստում, իրացնում Նոյեմբերյանում եւ Երեւանում: Ձեռնարկության սեփականատեր Արշալույս Իսրայելյանը հայտնեց, որ ներկայումս բնակչությունից կաթ չեն ընդունում, առաջիկայում կսկսեն կաթի հավաքումը Ոսկեպար, Բաղանիս, Դովեղ գյուղերում, քիչ չափով՝ նաեւ Նոյեմբերյան քաղաքում,լիտրը՝ 150 դրամով: Ա. Իսրայելյանն ասաց, որ նախատեսում են հավաքած կաթից ոչ միայն պանիր, այլեւ՝ մածուն պատրաստել:
2008թ. Իջեւանի տարածաշրջանի Ազատամուտ համայնքում «Հայաստան» համահայկական հիմնադրամի ֆինանսավորմամբ ստեղծվեց կաթի ընդունման կետ: Այն Ազատամուտի եւ հարեւան համայնքների ֆերմերներից հավաքած կաթը հանձնում էր «Աշտարակ կաթ» ընկերությանը: Մի քանի ամիս աշխատելուց ընդունման կետը փակվեց:
2012 թ. դեկտեմբերի 11-ին Տավուշի մարզպետ Արմեն Ղուլարյանը մարզպետարանում մամուլի ասուլիս է ունեցել, որի ժամանակ ներկայացրել է գյուղատնտեսական տարվա արդյունքները, ձեռքբերումները: Տավուշցի լրագրողները մարզպետին հարցեր են ուղղել գյուղատնտեսական խնդիրների՝ այդ թվում մարզում հիմնված, սակայն չգործող կաթի ընդունման կետերի մասին:
Հավելենք, որ 2012թ. հոկտեմբերի 21-ին գյուղատնտեսական աշխատողի օրվա եւ գյուղատնտեսության ոլորտում հաջողությունների կապակցությամբ գյուղնախարար Սերգո Կարապետյանը 5 մարզպետների՝ այդ թվում Տավուշի մարզպետ Արմեն Ղուլարյանին պարգեւատրել է գյուղնախարարության ոսկե մեդալով:
Ոսկան ՍԱՐԳՍՅԱՆ
