Անկարայի ոստիկանությունը Անկարայի գլխավոր դատախազությանը հայտնել է, որ լրագրող Թեմել Դեմիրերը խախտել է Թուրքիայի քրեական օրենսգրքի 301 հոդվածը, երբ նա մամուլում հայտարարություն է արել այն բանից հետո, երբ նույն հոդվածի մեղադրանքով նրա նախնական դատավարությունը հետաձգվել է: Գրում է «Բիանեթ» լրատվականը:
Առաջին դատը հետաձգվեց 6352 օրենքի 1-ին և 2-րդ պայմանական հոդվածների հիմքով և երաշխիքով, որ հետագա 3 տարիներին նա նոր հանցանք չի գործի:
Ըստ ոստիկանության հաղորդագրության, դատավարությունից հետո, Դեմիրերը դատարանի շենքի առջև ասել է. «Եթե ես առաջիկա երեք տարիների ընթացքում չասեմ «Թուրքիայում հայերի ցեղասպանություն է եղել» կամ «Թուրքիան մարդասպան պետություն է»՝ ես կարդարացվեմ: Հենց հիմա, դատավարությունից հինգ րոպե անց, ես ասում եմ «Պետությունն է սպանել Հրանտ Դինքին», նաև ասում եմ «Այս պետությունում հայերի ցեղասպանություն է եղել»: Եթե դատարանը, անվտանգության ուժերը կամ արդարադատության նախարարությունը, որոնք հետաձգել են իմ դատավարությունը, չբացեն մեկ այլ դատավարություն, նրանց հանցանք կկատարեն»:
«Ես ոչ ոքի չեմ հրահրում հանցանք կատարելու: Ասածս այն է, որ այս երկրում մտքերը չեն կարող կապանքի տակ լինել: Ես Իմայիլ Բեշիկչիից, Ֆիքրեթ Բաշկայայից ու Բասկին Օրանից (գիտնականներ, որոնք ազատազրկվել են կամ ճնշումների են ենթարկվել իրենց աշխատությունների համար) սովորել եմ, որ մտքի ազատությունը բարձր արժեք է: Այս երկրում հայերի ցեղասպանություն է եղել: Պետությունը սպանել է Հրանտ Դինքին: Սրանք իմ մտքերն են: Այնպես, որ եթե ուզում եք, կրկին դատեք ինձ»:
Կարդացեք նաև
Առաջին դատավարությունը լրագրողի դեմ բացվել էր, երբ Հրանտ Դինքի սպանությունից հետո Դեմիրերն ասել էր. «Հրանտ Դինքին հայ լինելու համար չեն սպանել, այլ Հայոց ցեղասպանության փաստն արձանագրելու»:
Պատրաստեց Հովհաննես ԻՇԽԱՆՅԱՆԸ
