Այսօր Շիրակի մարզի ընդհանուր իրավասության դատարանը շարունակեց քննել 27-ամյա Կարեն Եսայանի սպանության գործը :
Դատական նիստն անցավ անչափ լարված մթնոլորտում, սպանված Կարեն Եսայանի մայրը` տիկին Անահիտը, պարբերաբար հուզվում, ու վիրավորում էր իր դիմաց նստած ամբաստանյալին, ինչին էլ հակադարձում էին վերջինիս հարազատները:
Հիշեցնենք , որ այս գործով մեղադրվում է Անիի նախկին ոստիկանապետ Սամվել Սարգսյանի որդին` Հարություն Սարգսյանը:
Այսօր քննվեց ընդամենը մեկ վկա` Աննա Գրիգորյանը, որի ամուսինը ամբաստանյալի ազգականն է: Վկան աշխատում է Ցողամարգ գյուղում` որպես երգ-երաժշտության ուսուցչուհի, և դատարան էր կանչվել այն պատճառով, որ Հարություն Սարգսյանի արծաթափայլ «Մերսեդես» մակնիշի մեքենան իրականում գրանցված է եղել նրա անունով:
Կարդացեք նաև
Նշենք նաև, որ Անիի նախկին ոստիկանապետ Սամվել Սարգսյանի դեմ քրեական գործ էր հարուցվել՝ հենց այս վկայի ցուցմունք տալը քննչական բաժնում խոչընդոտելու պատճառով: Այսօր դատարանը փորձում էր պարզել, իրականում այդ մեքենան Աննա Գիրգորյանի՞ն է պատկանել, թե՞ ձևականորեն գրանցել են նրա անունով: Վկան ասաց, որ ո՛չ ինքը, ո՛չ էլ ամուսինը մեքենա վարել չգիտեն, և քանի որ ավտոտնակ էլ չունեին, ուստի իրենց մեքենան կանգեցրել էին «Հարությունենց հայաթը»: Անհրաժեշտության դեպքում էլ Հարությունի հորը` «Սամվել ձյաձյային» խնդրել են գա ու իրենց որևէ տեղ տանի:
Կասկածելով տիկնոջ ցումունքի ճշմարտացիությանը` Կարեն Եսայանի մոր` Անահիտ Իսկանդարյանի լիազոր ներկայացուցիչը հետաքրքրվեց, թե վկան հիշո՞ւմ է մեքենայի գույնը, պետհամարանիշը: Վկան ասաց, որ պետհամարանիշը չի հիշում, ինչն էլ հունից հանեց լիազոր ներկայացուցչին: Վերջինս ասաց. «Ամբողջ Գյումրի գիտի, որ այդ մեքենան գերմանական պետհամարնիշով է, դուք չգիտե՞ք, ես զարմանում եմ նաև Գյումրու պետավտոտեսչության աշխատակիցների վրա, որոնք աչք են փակել պետհամարանիշների վրա `վարչական տուգանքի չենթարկելով արտոնյալ վիճակում գտնվող Հարությունին»:
Հարություն Սարգսյանի փաստաբանը խնդրեց պահպանել դատավարական կարգը, ինչն էլ անչափ զայրացրեց Անահիտ Եսայանին, նա նեղվեց, որ իր փաստաբանին չեն թույլատրում խոսել ու սպառնալիքներ հնչեցրեց ամբաստանյալի հասցեին:
Վկան չկարողացավ նաև պատասխանել այն հարցերին, թե մեքենան ի՞նչ գնով են ձեռք բերել, մեխանիկական տուփ ունե՞ր, թե՞ ավտոմատ էր աշխատում, կափարիչ ունե՞ր, թե՞ ոչ: Վկան ասաց, որ դրանք մասնագիտական հարցեր են, ինքը չի կարող պատասխանել: Սա ևս հունից հանեց լիազոր ներկայացուցչին, ով նետեց, թե երկարամյա ուսուցչուհուն բնավ մասնագիտական գիտելիքներ պետք չեն այդ ամենը տեսնելու համար:
Լիազոր ներկայացուցիչը առաջարկեց երդվել, որ վկայի տված ցուցումքը ճիշտ է , վկան երդվեց հոր գերեզմանով: Վերջում Անահիտ Իսկանդարյանի լիազոր ներկայացուցիչը սպառնաց, որ հետամուտ է լինելու կեղծ ցուցմունք տվողներին պատասխանատվության ենթարկելու հարցում: Նա պնդում էր, տիկնոջ ցուցմունքը իրական չէ, այլ ուղղորդված, և որ մեքենան փաստացի պատկանում է Հարություն Սարգսյանին, վերջինս իր գրած ցուցմունքում հաստատել է այս փաստը:
Ինչևէ, վկա Աննա Գրիգորյանը դժգոհեց քննիչից, որ իրենից ցուցմունքներ է կորզել սպառնալիքների ներքո, չի թույլատրել ցուցմունք տալ պաշտպանի ներկայությամբ: Այս վկան նաև պատմեց մի դրվագ Անիի նախկին ոստիկանպետ Սամվել Սարգսյանի ու քննիչի հանդիպումից: Տիկինն ասաց, որ ինքը քննչական բաժին էր եկել իր անչափահաս որդու հետ, որին կանգեցրել են միջանցքում: Ինքը սկզբում հրաժարվել է ցումունք տալ, բայց երբ քննիչը ստիպել է գրել, ինքը շատ վատ է զգացել: Հանկարծ քննչի առանձնասենյակ է մտել իր բարեկամը` Աննի նախկին ոստիկանապետը, ով ձեռքով բարևել է քննիչին, ինքն էլ առիթից օգտվելով` դուրս է եկել իր երեխայի մոտ: Իսկ թե Սամվել Սարգսյանը ի՞նչ է զրուցել քննիչի հետ, տիկինն պնդում էր, որ ինքը ներկա չի եղել:
Նշենք, որ Անիի նախկին ոստիկնապետի դեմ քրեական գործ է հարուցվել հենց այս բարեկամին չթույլատրելու համար, որ ցումունք տա իր տղայի գործով:
Դատը մինչև երկուշաբթի հետաձգվեց մյուս վկաների ներկա չլինելու պատճառով:
Նունե ԱՐԵՎՇԱՏՅԱՆ
