Նախկին ԱԺ պատգամավոր, «Ազգային համագործակցություն» հիմնադրամի գործադիր տնօրեն Արշակ Սադոյանը չնայած չի հավատում, որ Սահմանադրական դատարանը կբավարարի Րաֆֆի Հովհաննիսյանի հայցը, սակայն իր առաջարկությունն է ներկայացնում ստեղծված քաղաքական ճգնաժամից դուրս գալու համար:
«Սահմանադրական դատարանը, ըստ էության, այլ որոշում չի կայացնի, կարող է կայացնել, բայց չի կայացնի: Մենք առաջարկում ենք, որ պետք է ստեղծվի աշխարհով մեկ կազմակերպություն, հանրապետություն»,- այսօր «Զարկերակ» ակումբում հայտարարեց Ա. Սադոյանը` նշելով, որ իրենց հիմնադրամը բազմիցս հանդես է եկել սփյուռքի ներուժը համախմբելու, Ազգային ժողովը երկպալատանի սարքելու, ինչպես նաեւ Սահմանադրությունում արմատական փոփոխություններ կատարելու առաջարկություններով:
«Հաճախ Րաֆֆի Հովհաննիսյանի միտինգներում հնչում է «Հայաստան, Հայաստան» կոչը, ինչո՞ւ չի հնչում «հայ ժողովուրդ» կոչը»,- զարմանքով նշեց պարոն Սադոյանը ու ընդգծեց, որ ստեղծված իրավիճակում սփյուռքի դերը պետք է ավելի շատ կարեւորել, մանավանդ, եթե հաշվի առնվի երկրից արտագաղթածների թիվը:
Aravot.am-ի այն հարցին, թե արդյոք համաձա՞յն է հնչեցված այն տեսակետի հետ, թե իբրեւ Րաֆֆի Հովհաննիսյանը կանգնած է եղել փակուղու առաջ, այդ պատճառով է որոշել հացադուլ անել, Արշակ Սադոյանը պատասխանեց.
Կարդացեք նաև
«Իմ խորը համոզմամբ, իմ անձնական կարծիքով, Րաֆֆի Հովհաննիսյանը հացադուլ անելու որոշումը վաղուց էր կայացրել, ուղղակի իր թիմակիցներին չէր հայտնել այդ մասին: Կարծում եմ, որ հացադուլ անելու որոշումը նրա անձնական որոշումն է, այլ` ոչ թե այլ մեկի կողմից պարտադրված»:
Աշոտ ԱԹԱՅԱՆ
