«Անցած գումարման խորհրդարանի ժամանակ գործ ունեինք կոնկրետ ծրագրերի եւ դրանց կատարողականի անհամատեղելիության հետ, այս գումարման խորհրդարանի դեպքում գործ ունենք անորոշության հետ: Մասնավորապես ՀՀԿ-ի ու ԲՀԿ-ի նախընտրական ծրագրերը նախորդի համեմատ բավականին անորոշություն են պարունակում, եւ սա թույլ չի տալիս չափել նրանց ծրագրային մոտեցումների կատարողականը»,- այսօր «Մեդիա » կենտրոնում ասաց «ԱԺ օրենսդրական գործունեության մոնիթորինգ» ծրագրի փորձագետ Գոռ Աբրահամյանը` ներկայացնելով 5-րդ գումարման ԱԺ գործունեության իրենց վերլուծությունները:
Նրա խոսքերով, կոնկրետ են ՀՀԿ-ի այն ծրագրային դրույթները, որոնք մնացել են նախորդ գումարման ԱԺ ծրագրերից: Մոնիթորինգի խումբը պարզել է, որ ՀՀԿ-ի ներկայացրած ծրագրերից ու գործողություններից հակասություններ կան էթիկայի հանձնաժողովի հետ կապված. «Ծրագրում նշվել է, որ կուսակցությունը հետամուտ է լինելու հանձնաժողովի կայացմանը, ամրապնդմանը, բայց հետագայում ԱԺ կանոնակարգով ներկայացված նախագծերի ժամանակ նկատվել է, որ հանձնաժողովը ցանկանում են քաղաքականացնել»:
ԲՀԿ-ին անդրադառնալով` մոնիթորինգի խմբի փորձագետ Գ. Աբրահամյանն ասաց, որ նկատվել է որոշակի անհետեւողականություն նախկին խորհրդարանից եկող ծրագրերը կյանքի կոչելու առումով: Մասնավորապես՝ կուտակային կենսաթոշակային համակարգի եւ եկամտային հարկի ներդրման դեպքում: Պարոն Աբրահամյանի դիտարկմամբ, կուսակցությունը, երբ դեռ կոալիցիա էր, կիսում էր սոցիալական ոլորտի պատասխանատվությունը իշխանությունների հետ. «Բայց այժմ ավելի խուսափողական կեցվածք է դրսեւորել»:
ՕԵԿ-ի պարագայում, մոնիթորինգի խումբը արձանագրել է համահունչ ներդաշնակություն կառավարության հետ: ՕԵԿ-ի որոշ նախաձեռնություններ, որոնք նախորդ խորհրդարանից տեղափոխվել են այս գումարման խորհրդարան, ՕԵԿ-ի կողմից բավարար հետեւողականություն չի ցուցաբերվել այդ նախագծերը առաջ մղելու առումով. «Նկատելի է` այդ ծրագրային մոտեցումներից բխող օրենսդրական նախաձեռնությունները կոալիցիոն պարտավորություններին զոհաբերելու միտում»:
Կարդացեք նաև
Պարոն Աբրահամյանի խոսքերով, զարմանալի է` «Ժառանգությունը» , բոլոր հիմնական խնդիրներին, առաջնահերթություններին անդրադառնալով, կենսաթոշակային համակարգի հետ կապված որեւէ դրույթ չունի :
Պարոն Աբրահամյանը ռոմատիկ մոտեցումներ է նկատում ոչ միայն «Ժառանգության», այլեւ ՀՅԴ-ի ծրագրային որոշ դրույթներում: Ըստ նրա, նախատեսված որոշ դրույթներում այնքան էլ հիմնավորված չեն երեւում, թե կուսակցություններն ինչպես են նախատեսում դրանք իրագործել, օրինակ նվազագույն աշխատավարձի կամ կենսաթոշակի սահմանմանը եւ առանձին ոլորտներին վերաբերող այլ առաջարկներում:
«Կա այդպիսի մի տենդենց ՀՅԴ-ի ծրագրի պարագայում. Օրինակ 200.00 աշխատատեղ ստեղծելու մոտեցման դեպքում չի երեւում այն ամբողջ ենթահամակարգը, որի միջոցով սա կարելի է իրատեսական համարել: Մնացած բոլոր առումներով «Ժառանգությունն» ու ՀՅԴ-ն գործել են իրենց ծրագրային մոտեցումների դաշտում»:
ՀԱԿ-ի մասով էլ պարոն Աբրահամյանն ասաց, որ նկատելի է` ԱԺ քննարկումների ժամանակ ՀԱԿ պատգամավորները կենտրոնում են ոչ այնքան բովանդակային քննարկումների, որքան քաղաքականացնելու, ինչ-որ տեղ հակադրվելու մոտեցումների վրա:
Արփինե ՍԻՄՈՆՅԱՆ
