Լեւոն Մութաֆյանը պաշտոն չի ուզում
Օրերս «Արամ Խաչատրյան» համերգասրահում կայացավ թատերագետ Լեւոն Մութաֆյանի «Մեր օրերի հայ անվանի կանայք» գրքի շնորհանդեսը: Գիրքն իր տեսակի մեջ հետաքրքիր է եւ «ոչ ավանդական», քանի որ ներկայացված են տարբեր ոլորտներում (քաղաքականությունից մինչեւ մշակույթ եւ լրագրություն) մեծ ձեռքբերումների հասած կանայք, որոնց հեղինակը ներկայացրել է նաեւ մարդկային նկարագրերի, անձնական մտորումների ու խոհերի համադրումով:
«Առավոտը» թատերագետից նախ հետաքրքրվեց՝ գուցե այս գրքի ստեղծման գաղափարը «հուշել» է ժամանակին ԱՄՆ-ում տպագրված Ալիս Նավասարդյանի իսկապես շքեղ «Հայ անվանի կանայք» գիրք-ալբոմը: «Բարձր գնահատելով տիկին Նավասարդյանի կատարած աշխատանքը, այնուամենայնիվ նշեմ, որ իմ հեղինակածը կապ չունի նրա գիրք-ալբոմի հետ: Ես անձնական շփումների արդյունքում ստեղծել եմ դիմանկարային 15 ակնարկ, ցանկանալով բացահայտել մեր նշանավոր տիկնանց հաջողությունների գաղտնիքը, ցույց տալ նրանց բնավորությունները, անգամ նրանց դիտարկելով առօրյայի մեջ»,- հայտնեց պարոն Մութաֆյանը: Ապա հավելեց. «Նրանցից ամեն մեկի համար ընտրել եմ առանձին ձեւ: Օրինակ՝ հայ բեմի մեծ տիկին Վարդուհի Վարդերեսյանի դեպքում ստեղծել եմ նրա մտերմական դիմանկարը, մեկ այլ հերոսուհու՝ Լուիզ-Սիմոն Մանուկյանին ներկայացնելով, արժեւորել եմ նշանավոր տիկնոջ բարեգործական գործունեությունը, իսկ բանաստեղծուհի Ալիսիա Կիրակոսյանի դեպքում՝ դիմել եմ գրական ակնարկի ժանրին»: Կայացած շնորհանդեսին ներկա էին ՀՀ նախագահի տիկինը, Երեւանի քաղաքապետը, բարձրաստիճան պաշտոնյաներ եւ այլք: Իսկ շնորհանդեսից ընդամենը մեկ օր անց՝ մարտի 10-ին, Լեւոն Մութաֆյանը հայտնվեց Րաֆֆի Հովհաննիսյանի հրավիրած հանրահավաքի հարթակում, ավելին՝ հանդես գալով հռետորական ելույթով: Այս առիթով մեր զրուցակիցն ասաց. «Ես ընդդիմադիր չեմ՝ որպես քաղաքականությամբ զբաղվող մարդ, իշխանամետ էլ չեմ: Իմ նպատակն է հասնել ազգային համաձայնության, վերջ դնել այն դիմակայությանը, որն այսօր ձեւավորվել է իշխանության եւ ժողովրդի մի մասի միջեւ: Կոչ եմ արել պաշտոնյաներին գալ հրապարակ, բարեւ ասել ժողովրդին, որպեսզի ձեւավորվի ճշմարիտ երկխոսություն: Առաջարկել եմ ձեւավորել համերաշխության կլոր սեղան, քանի որ ցանկացած անխոհեմ քայլ ու չարդարացված հեղափոխականություն կարող է կործանարար լինել մեր երկրի համար…»:
Արդյոք մասնակցությունն ու ելույթը հանրահավաքում չի՞ ակնկալում պաշտոնի ձգտում: Այս հարցին Լեւոն Մութաֆյանը պատասխանեց. «Պաշտոն կարող եմ խնդրել իշխանություններից, ինչի համար անհրաժեշտ չեն հրապարակային ելույթները, իսկ ես իմ պաշտոնը վաղուց ունեմ. դա մտավորականի պաշտոնն է»:
Կարդացեք նաև
ՍԱՄՎԵԼ ԴԱՆԻԵԼՅԱՆ
«Առավոտ» օրաթերթ
Լևոն Մութաֆյանը մեր այսօրվա մտավորականության դասական տեսակն է: Որպես այսօրվա մեծ մտավորական, թեպետ ինձ ոչ ոք չի ճանաչում, ինչպես և մյուսներին՝, կուզեմ շարունակել խորհուրդ
տալ, որ իրոք միայն համերաշխությունը կլոր սեղանի շուրջ,՝ կբերի բարեկեցություն: Այ օրինակ՝
հհկ-ն, բհկ-ն, և օեկ-ն ժամանակին հասկանալով այդ պարզ փիլիսոփայությունը, համերաշխ նստեցին
կլոր սեղանի շուրջ, որի վրա առատորեն լցված էր՝ խաշը, խորովածը, քյաբաբը, թփով տոլման և էլի
հազար ու մի՝ բաստուրմա: Բաժակաճառերով խորը վերլուծության ենթարկեցին տիրող իրավիճակի
պայթուցիկ հեղափոխական հետևանքները և եկան եզրակացության, որ համերաշխությունից լավ բան
չկա, և այն բաժանեցին ըստ արժանապատվության, որոնցից օրինակ՝ արթուր բաղդասարյանը, որը
իր ելույթով հաստատեց, որ առավել արժանապատիվն է,՝ ստացավ իր յուղալի բաժինը: Կարծում եմ
այդ կլոր սեղանի շուրջ, ոչ ոք դատարկ ամանները չլպստեց, այլ հակառակ, որպեսզի լիությունից
տրաքող սեղանը փրկեն, ամեն մեկը իր հերթին գրպանները լցրեց ափսեների մեջի բարիքներից,՝ բարեկամների, հարևանների համար: Շարունակությունը ինքներդ լավ գիտեք: