«Սերժ Սարգսյանը եւ նրա թիմը երբեք չեն գնա այն ճանապարհով, որ յուրայինների դիակների վրայով անցնեն», հայտարարել է ՀՀԿ փոխնախագահ Գալուստ Սահակյանը։
«ՉԻ» – Եթե հիշում եք՝ Սերժ Սարգսյանը ՀՀ նախագահի պաշտոնը ստանձնել է 2008թ. ապրիլի 9-ին։ Այդ օրը մարտի 1-ի զոհերի «քառասունքն» էր։ Բոլոր տասը զոհերն, ի դեպ, ՀՀ քաղաքացիներ էին, այսինքն՝ յուրայիններ, եւ ամենեւին էլ պատահաբար չէին զոհվել։ Ինչ-որ մեկը հստակ հրաման էր տվել կրակել ժողովրդի վրա, եւ այդ «ինչ-որ մեկը» հաստատ Սերժ Սարգսյանի «թիմից» էր (կամ էլ՝ Սերժ Սարգսյանն էր նրա թիմից): Ամեն դեպքում՝ սպանությունները չբացահայտվեցին։ Մի խոսքով, «յուրայինների դիակների վրայով անցնելը» Սերժ Սարգսյանի համար կարծես թե նորություն չէ։ Այլ հարց է, որ երբ Գալուստ Սահակյանն ասում է «մենք զոհերի կողմնակից չենք», նա միանգամայն անկեղծ է։ Իհարկե իշխանությունն առանց զոհերի խլելն ավելի ցանկալի կլիներ։ Պարզապես Սերժ Սարգսյանին նման «մանրուքները» երբեք էլ առանձնապես չեն հետաքրքրել։ Մանավանդ, երբ խաղասեղանին դրված է եղել իշխանությունը:
«Չորրորդ ինքնիշխանություն»
