Ընդմիջումից հետո Սահմանադրական դատարանում շարունակվեցին հարցերը, որոնք ուղղված էին դիմումատու՝ ՀՀ նախագահի թեկնածու Րաֆֆի Հովհաննիսյանի ներկայացուցիչներ Կարեն Մեժլումյանին եւ Զարուհի Փոստանջյանին: Զարուհի Փոստանջյանը պահանջում էր, որ պատասխանողը՝ ԿԸՀ նախագահ Տիգրան Մուկուչյանը իր գործընկերոջը՝ Կարեն Մեժլումյանին ուղղված հարցերը նորից կրկնի, իսկ երբ Մուկուչյանը հրաժարվեց, ասելով, որ ինքը բավարարված է Կարեն Մեժլումյանի պատասխաններից, դիմեց ՍԴ, որպեսզի հրապարակվեն բոլոր այն հարցերը, որոնց ինչ-ինչ առումներով չէր պատասխանել Կարեն Մեժլումյանը (գուցե նաեւ մարտավարությունից ելնելով): ՍԴ նախագահը դիտողություն արեց կողմին՝ ասելով, որ ճշտեն, թե իրենցից ով է պատասխանում:
Այնուամենայնիվ, շարունակվեց հարցուպատասխանը եւ դիմումատու կողմին հասցրեցին հարցեր տալ Սերժ Սարգսյանի ներկայացուցիչ Հրայր Թովմասյանը, հարակից պատասխանող ճանաչված, ՀՀ ոստիկանության ներկայացուցիչ Թաթուլ Պետրոսյանը:
Ի դեպ, Զարուհի Փոստանջյանը մեղադրեց ոստիկանությանը, որ ընթացք է տվել այն դեպքերին, երբ մամուլն է գրել, թեկնածուներն են հայտնել լրատվամիջոցներով, իսկ ոստիկանությունը գոնե մեկ խախտում չի հայտնաբերել:
Թաթուլ Պետրոսյանը հարցրեց, թե արդյոք կողմը, երբ տեսաերիզներն է ներկայացրել որպես ապացույց, ուսումնասիրել է, արդյոք այնտեղ առկա՞ են եղել առերեւույթ խախտումների մասին, Զարուհի Փոստանջյանը պատասխանեց. «Ամբողջ ծովը չպետք է խմել, որպեսզի ասեն, թե աղի է ջուրը»: ՀՀ նախագահի մեկ այլ թեկնածու՝ Անդրիաս Ղուկասյանը դատարանին ներկայացրեց իր դիտարկումները, որոնք դատարանը կբազմացնի եւ կբաժանի դատավարության բոլոր կողմերին, այդ իսկ պատճառով դատական նիստը հետաձգվեց եւ կշարունակվի վաղը, ժամը 10.00-ին:
Կարդացեք նաև
Ի դեպ, ՍԴ-ում Անդրիաս Ղուկասյանն արդեն իր սենյակն ունի եւ սենյակի վրա գրված է «Անդրիաս Ղուկասյանի սենյակ»:
Ռուզան ՄԻՆԱՍՅԱՆ
