Վազգեն Սաֆարյանը կարծում է, որ նոր կառավարության կազմում պետք է ընդգրկված լինեն միայն ոլորտի մասնագետներ
Հայրենական ապրանք արտադրողների միության նախագահ Վազգեն Սաֆարյանի կարծիքով, ընտրված նախագահի ու ապագա կառավարության առաջնահերթ քայլերից պետք է լինի նոր տնտեսական քաղաքականության մշակումը: Ըստ նրա` հասարակությունը երկար չի կարող հանդուրժել գործազրկությունը, արտագաղթը եւ սոցիալական անարդարությունը, որն այժմ տիրում է երկրում:
«Նոր կառավարությունը պետք է նոր ռազմավարություն մշակի: Այս կառավարությունը իր գործունեության ընթացքում, այդուհանդերձ, մի քանի արմատական փոփոխություններ կարողացել է մտցնել»,- այսօր «Փաստարկ» ակումբում ասաց Վ. Սաֆարյանը` նշելով, որ այդ փոփոխությունները վերաբերվում են արդյունաբերական քաղաքական ռազմավարությանը, ինչպես նաեւ` բանախոսի պնդմամբ` կառավարության կողմից որոշակի քայլեր են ձեռնարկվել արտահանումը խթանելու նպատակով:
Հայրենական ապրանք արտադրողների միության նախագահի խոսքով, արդյունաբերության զարգացման համար պետք է ընդունվի արդյունաբերության զարգացման մասին օրենք, ինչպես նաեւ նոր կառավարությունում պետք է կատարվեն կառուցվածքային փոփոխություններ:
Կարդացեք նաև
Վազգեն Սաֆարյանն ընգծելով, որ նոր կառավարությունում չպետք է լինեն պատահական մարդիկ, այլ` ոլորտի մասնագետներ, այնուամենայնիվ, չցանկացավ կոնկրետ անուններ նշել:
Aravot.am-ի այն հարցին, թե արդյոք հայ արտադրողների շրջանում կա՞ տեղեկացվածության պակաս արտասահմանյան շուկայի հետ կապված, պարոն Սաֆարյանը պատասխանեց.
«Ես կարծում եմ, որ բոլոր այն երկրներում, որտեղ Հայաստանն ունի դեսպանատներ, այնտեղ պետք է լինեն նաեւ առեւտրային կցորդներ, ովքեր կուսումնասիրեն տվյալ երկրի շուկան եւ մեզ պետք է հայտնեն` ինչ հայկական ծագման ապրանքներ կարող են այդ շուկաներում իրացվել: Մենք պիտի օգտագործենք մեր դեսպանատների աշխատանքը, պիտի օգտագործենք Սփյուռքի ներուժը: Սփյուռքի նախարարությունը ոչ թե միայն պետք է զբաղվի մշակութային գործունեությամբ, այլեւ` տնտեսական»:
Աշոտ ԱԹԱՅԱՆ
