ՀՀԿ փոխնախագահ Գալուստ Սահակյանը ցավում է հացադուլի դուրս եկած Րաֆֆի Հովհաննիսյանի համար:
Այսօր «Պոստ սկրիպտում» ակումբում անդրադառնալով Ր. Հովհաննիսյանի հայտարարությանը, թե ապրիլի 9-ին Սերժ Սարգսյանը կերդվի իր դիակի վրա, ասաց «Ինձ համար ընդունելի չէ հացադուլը, ցավում եմ դրա համար: Ինչ վերաբերում է նման տիպի հայտարարություններին, նրանք, ովքեր հարթակներում եղել են, ժողովրդի հետ շփվում են եւ ավելի խրոխտ են դառնում իրենց տեսակետների մեջ: Երեւի լեզվի սայթաքում է, իսկ եթե `ոչ, դա այն տարբերակն է, որ անընդհատ տարբեր քաղաքական գործիչներ նշում են: Առավել եւս խոցելի է այն, որ այդ նույն հարթակում ժողովրդի մեջ թուրքեր որոնել կամ Ղարաբաղը գավառ համարել: Նման հանգույցներով տրամաբանական չէ ժողովրդին առաջնորդելը: Կարծում եմ` որոշակի շրջանում, մանավանդ `ցույցերը խաղաղ են անցնում, այն զանգվածը, որը ողջունելի են համարում ընդդիմադիր երթը, պետք է զգան, որ չի կարելի ժողովրդի մեջ թուրքեր որոնեն, Ղարաբաղի խաղաղ բանակցային մթնոլորտը տանել մի այլ ուղղությամբ եւ չի կարելի հատկապես ոչ ազգային մեկնաբանությունների անցումներ կատարել»:
Պարոն Սահակյանի խոսքերով, Ս. Սարգսյանն ու իր թիմը երբեք չեն գնա յուրայինների դիակների վրայով. «Մանավանդ` Սերժ Սարգսյանը բավականին շատ դիակներ է տեսել եւ այդ հաղթանակի ամբողջ ընթացքում կարողացել է յուրայինների համար ցավել եւ տանել պատերազմական իրողություններն այնպես, որ քիչ զոհեր ունենանք: Զոհերի կողմնակից չենք եւ պատերազմի ժամանակ էլ ասում ենք` մեռնելու իրավունք չունես: Մեռնել նշանակում է հիասթափություն, անկարողություն: Չեմ գնահատում Րաֆֆի Հովհաննիսյանի այս դարձվածքը»:
Կարդացեք նաև
Հարցին՝ Ր. Հովհաննիսյանին է՞լ եք յուրային համարում, պարոն Սահակյանն ասաց` այո իհարկե:
Հարցի շարունակությանը, թե Սերժ Սարգսյանը չի՞ երդվի, պարոն Սահակյանն ասաց. «Սերժ Սարգսյանին ժողովուրդն արդեն երդվել տվել է, մնում է ցերեմոնիկ իրավիճակը, որը կարձանագրի այնպես, ինչպես Սահմանադրությունն է պահանջում»:
Հարցին, Սերժ Սարգսյանը կայցելի՞ Ազատության հրապարակում հացադուլի մեջ գտնվող Րաֆֆի Հովհանիսյանին, Գ. Սահակյանն ասաց. «Փիառի տեսակետից շատ լավ բան է, բայց երիտասարդական ռոմանտիկայի մեջ եք: Կայցելի, թե չի այցելի, չեմ կարծում, որ դրանից ժողովրդի փորը կկշտանա»:
Արփինե ՍԻՄՈՆՅԱՆ
Որտեղ՝ գալուստ սահակյան, այնտեղ՝ լիքը տաշտակը, և փորը կշտանալու միակ խնդիրը: