Ի՞նչ արդյունք են տվել Դիլիջանում իրականացված ծրագրերը
Տավուշի մարզպետարանի աշխատակազմի տվյալներով, 2013թ. հունվար ամսին մարզում ընտանեկան նպաստ է ստացել 4939 ընտանիք, որից՝1899-ը Իջեւանի, 1099-ը՝ Դիլիջանի, 1040-ը ՝Բերդի, 901-ը՝ Նոյեմբերյանի տարածաշրջանում: Մարզի սոցիալական ծառայություններ մատուցող տարածքային 4 գործակալություններին կից աջակցության խորհուրդների առաջարկությամբ այս տարվա առաջին եռամսյակում հրատապ դրամական օգնություն է ստանում 277 ընտանիք (106-ը՝ Իջեւանում, 55-ը՝ Դիլիջանում, 56-ը՝ Նոյեմբերյանում, 60-ը՝ Բերդում): Ավելի քան 134 հազար բնակիչ ունեցող մարզում ընդամենը 4939 ընտանիք է օգտվում ընտանեկան նպաստից: Դիլիջանի սոցիալական ծառայություններ մատուցող տարածքային գործակալությունը սպասարկում է Դիլիջան քաղաքին եւ քաղաքի մերձակա Թեղուտ ու Գոշ համայնքներին: Ընդհանուր առմամբ՝ այդ 3 համայնքներում, Տավուշի մարզպետարանի տվյալներով, ապրում է 18 452 մարդ: Բերդի տարածաշրջանում՝ Բերդ քաղաքում եւ տարածաշրջանի 16 գյուղերում, ըստ Տավուշի մարզպետարանի, ապրում է 30 733 մարդ: Բերդի սահմանագոտում ապրող 30 հազար բնակչության մեջ աղքատության նպաստից ավելի քիչ օգտվող կա, քան Դիլիջանի տարածաշրջանի 18 հազար բնակչության մեջ: Բայց չէ՞ որ վերջին տարիներին Դիլիջանում բազմաթիվ օբյեկտներ են կառուցվել, ծրագրեր իրականացվել, ստեղծվել բազում աշխատատեղեր:
Ոսկան ՍԱՐԳՍՅԱՆ
Եթե չեմ սխալվում, Դիլիջանի սոցիալական ծառայություններ մատուցող տարածքային գործակալությունը բացի Դիլիջան քաղաքից, Գոշ և Թեղուտ համայնքերից սպասարկում է նաև Հաղարծին համայնքին: