«Պահանջում ենք վավերացնել հայ ժողովրդի հաղթանակը» պահանջով մի խումբ ակտիվիստների, այդ թվում՝ դասադուլավորների ոստիկանները թույլ չեն տալիս մոտենալ Սահմանադրական դատարանին: Երեւանի փոխոստիկանապետ Վալերի Օսիպյանը նրանց բացատրում է, որ դատարանի շենքին մոտենալու դեպքում նրանք կխանգարեն այս պահին դատարանում ընթացող դատական նիստին:
Այս պահին ՍԴ-ում քննվում են «Հայաստանի Հանրապետության Նախագահ ընտրվելու մասին» կենտրոնական ընտրական հանձնաժողովի փետրվարի 25-ի որոշումը անվավեր ճանաչելու պահանջով Րաֆֆի Հովհաննիսյանի Անդրիաս Ղուկասյանի դիմումները:
«Պետք էլ չէ, ողջ աշխարհը գիտի, որ դուք այստեղ եք»,- քաղաքացիների պնդմանը, թե իրենց պահանջը լսելի չի լինի ՍԴ-ին՝ այդքան հեռու կանգնած լինելու պատճառով, հանգստացրեց պարոն Օսիպյանը:
Այս պահին ակտիվիստներին միացել են ՄԻՊ գրասենյակի երեք ներկայացուցիչ: Նրանցից մեկին ոստիկանները թույլ չտվեցին բանակցել ոստիկանների հետ, ասացին երկուսը բավարար են:
Կարդացեք նաև
ՄԻՊ ներկայացուցիչներից Արտակ Բարսեղյանը պարոն Օսիպյանի հետ զրույցում դժգոհեց, որ քաղաքացիների հանգիստ տեղաշարժվելու իրավունքն է խոչընդոտվում եւ դժգոհեց, որ մեծ դժվարությամբ անգամ իրեն թույլ տվեցին ոստիկանական շրջափակումից դուրս գալ: Պարոն Օսիպյանն էլ հակառակն էր համոզում՝ բացատրելով եւ ցույց տալով անցող քաղաքացիներին, որոնք տեղաշարժվելու խնդիրներ չունեին:
Արփինե ՍԻՄՈՆՅԱՆ
