«Ժառանգության» անդամը վստհեցնում է, որ Սերժ Սարգսյանի «պռոշը չի ճաքել» հայ ժողովրդի համար, որ ապահով Հայաստան կառուցի
«Ի՞նչ ապահով Հայաստան՝ 36 տոկոս աղքատների բանակով: Պարոն դե ֆակտո նախագահ, երբ դուք բռնազավթեցիք այդ աթոռը, ունեինք 26 տոկոս աղքատություն, այս 5 տարում 270 հազարով ավելացավ աղքատների բանակը»,- ասաց «Ժառանգություն» կուսակցության վարչության անդամ Սուսաննա Մուրադյանը Ազատության հրապարակում՝ անդրադառնալով Սերժ Սարգսյանի կարգախոսին:
Նա նշեց, որ Հայաստանում յուրաքանչյուր 3-րդ մարդ սոված է քնում. «Ծայրահեղ աղքատները՝ 46 հազարը դարձրիք 96 հազար: Հիմա էլ ասում եք ապահով Հայաստան: 250 հազար արտագաղթածներո՞վ եք գնում ապահով Հայաստան: Բզկտված ընդերքը, դրանո՞վ են գնում, կամակատար դատաիրավական համակարգո՞վ, թե՞ օրենքի սելեկտիվ կիրառմամբ: Ապահով Հայաստան եք գնում ծերանոցների թվի աճո՞վ, թե՞ մանկատների աճով: Խաբում եք մեզ: Դուք չեք կարող ստեղծել ապահով Հայաստան: Դուք չեք կարող բռնել կաշառակերի ձեռքը, ընտրակեղծարարի ձեռքը, որովհետեւ այդ թեթեւ ձեռքով եք ընտրվել նախագահ:Դրա համար, ինչպես Րաֆֆի Հովհաննիսյանն է ասում, դուք պետք է ներողություն խնդրեք հայ ժողովրդին եւ հեռանաք»:
Բազմությունը գոռում էր՝ «հե-ռա-իր, հե-ռա-ցիր»:
Կարդացեք նաև
Ըստ Սուսաննա Մուրադյանի, Սերժ Սարգսյանը ներողություն պիտի խնդրի, քանի որ 5 տարի առաջ խոստումներ է տվել ու չի կատարել, «հիմա էլ պռոշը չի ճաքել այս ժողովրդի համար, հեռացեք, քանի որ ձեր քրեաօլիգարխիկ բուրգը արդեն բազմաթիվ տեղերից ճաքեր է տվել, մաքուր օդը արդեն թափանցել է ներս եւ դրա փլվելը օրերի հարց է: Որպեսզի ձեր փոքրիկ Սերժիկը չհարցնի, պապի, ինչի՞ այնպես արեցիր, որ Հայաստանը նաեւ ձեր պատճառով հայաթափվեց, հեռացեք արժանապատվորեն, քանի համազգային ալիքը ձեզ չի քշել-տարել: Ապրիլի 9-ի դուք չեք կարող ձեր ձեռքը դնել Սահմանադրության վրա եւ երդվել, քանզի 1000 անգամ խախտել եք Սահմանադրությունը»:
Հռիփսիմե ՋԵԲԵՋՅԱՆ
