«Կինը պետք է կին մնա եւ լինի գնահատված ոչ միայն այսօր, մարտի 8-ին, այլ՝ տարվա բոլոր 365 օրերը: Ճիշտ է այնքանով այն փաստը, որ մենք ապրում ենք տղամարդկային պետության ներքո ձեւավորված պետությունում, որի ղեկավարման անմիջական պրոցեսին, սակայն, մեծ դեր են հատկացնում կանայք»,- ասաց Հայ-Ամերիկյան առողջության կենտրոնի գործադիր տնօրեն Խաչանուշ Հակոբյանը այսօր «Ֆորում» մամուլի ակուբում կայացած մամլո ասուլիսին:
Մարդու իրավունքների առաջին պաշտպան Լարիսա Ալավերդյանը մեծ տեղ է հատկացնում այն փաստին, որ կանայք մեր օրերում ավելի շատ են սկսել խոսել եւ բարձրաձայնել իրենց իրավունքների մասին. «Կինը պետք է առաջին հերթին ինքն իրեն պաշտպանի եւ դրանից հետո միայն պաշտպանված զգա: Այսօրվա հայ կնոջ կերպարը ես տեսնում եմ որպես կայացած անհատի նկարագրություն, որը կարող է իր լուման ունենալ երկրի զարգացման ցանկացած ոլորտում»:
Ազգային ժողովի պատգամավոր Մարգարիտ Եսայանը գտնում է, որ կինն ավելի ուժեղ էակ է, քան տղամարդը. կինն առաջնորդ է եւ առանց նրա կյանքն առաջ չէր գնա: Լրագրողների հետ հանդիպման ժամանակ Մ. Եսայանը համոզմունք հայտնեց, որ աշխարհն այլ տեսք կունենար, եթե կանայք ղեկավարեին այն: «Եթե մի հեղափոխություն լիներ աշխարհում, որից հետո կանայք իրենց ձեռքը վերցնեին իշխանությունը, աշխարհն ավելի լավը կլիներ, քան հիմա է», – ասաց պատգամավորը:
Իսկ այն հարցին, թե քաղաքականություն մտնելով ինչ է կորցրել, երկար տարիների լրագրողական փորձ ունեցող պատգամավորը նշեց, որ կորցրել է այն հաճույքը, որն ուներ լրագրող աշխատելու տարիներին: «Կորցրել եմ ազատ գրելու հաճույքը», – ասաց պատգամավորը: Միաժամանակ նա ընդգծեց, որ որպես կին ոչինչ չի կորցրել, քանի որ հիմա էլ նույնքան ծանրաբեռնված է, որքան լրագրող աշխատելու տարիներին, այսինքն՝ պատգամավոր լինելով՝ ստիպված չէ ավելի քիչ ժամանակ հատկացնել ընտանիքին:
Աննա ԹԱՄԱՄՅԱՆ
