Երգիչ Ռուբեն Հախվերդյանի համոզմամբ՝ «ավգյան ախոռները» կարող է մաքրել միայն Րաֆֆին` իր թիմով
Այսօր Րաֆֆի Հովհաննիսյանի հետ Գյումրու Թատերական հրապարակում էր նաև Ռուբեն Հախվերդյանը: «Ժառանգության» պատգամավորների ելույթներից հետո միկրոֆոնը փոխանցեցին նրան, ով գյումրեցիների ջերմ ծափահարությունների ու բացականչությունների ներքո , համեստորեն ասաց. «Ես բարձր տեղերից խոսելու շնորհք ըտենց չունեմ, բայց…»: Նրան ընդհատեց Րաֆֆի Հովհաննիսյանը` ասելով. «Մինչ ինքը իր շնորհքի մասին ուրանա, ողջունեք, Հայաստանի ժողովրդի, Երևանի, Գյումրվա ձայնը, քաղցրությունը, մշակույթը, մեր ոգին` Ռուբեն Հախվերդյան, ողջունեք»:
Երգիչը ողջույնների տակ շարունակեց . «Ես էն օրն ասել եմ, որ վերջապես Հայաստանի մայրաքաղաքը, Գյումրին, արթնացավ: Էսօր ամենագարշելի ու սարսափելի մարդիկ հավաքված են, հանցագործները, որոնք, որ օրենքներ պետք է հնարեն, ըստ էդ օրենքների, մենք պետք է ապրենք: Դրանք բոլորը գիտեք, որ կողոպտողներ են: Ո՞վ պետք է գա, որ մաքրի էդ ավգյան ախոռները, ախոռ մաքրողը պետք է լինի Րաֆֆին` իր թիմով: Իր թիմը կա, էդ ավգյան ախոռները պետք է մաքրվեն, թրիքը թրիքի վրա է եկել, 3 իշխանություն եկան, 3-ն էլ կողոպտեցին էս ժողովրդին: Սերժ Սարգսյանը ընդամենը իր բիզնեսների մասին է մտածում»: «Ամո~թ», -գոռաց ժողովուրդը` հավելելով. «Ռուբ, ինչ ասում ես, ճիշտ ես ասում»:
Ռուբեն Հախվերդյանի ելույթի ժամանակ հանկարծ սկսվեց խուճապ ժողովրդի մոտ. ոստիկանությունը, մոտենալով հրապարակում կանգնած մարդկանց, սպառնում էր վարչական տուգանքի ենթարկել, քանի որ հանրահավաքն ապօրինի է: Րաֆֆին բեմից ցած իջավ, ժողովուրդը, այլևս չլսելով Ռուբեն Հախվերդյանի խոսքը, վազեց «Ժառանգության» առաջնորդի հետևից: Նա մոտեցավ Շիրակի մարզի փոխոստիկանապետին` առաջարկելով վարչական տուգանք կիրառել իր նկատմամբ, ոչ թե կանգանածների: Եվ մինչ Րաֆֆի Հովհաննիսյանը խոսում էր ոստիկանների հետ, նրա հետևից եկած ժողովուրդը բացականչեց. «Րաֆֆի նախագահ, Րաֆֆի նախագահ»:
Կարդացեք նաև
Հավաքվածները այսպիսով վերցրեցին Րաֆֆիին ու ստիպեցին շարունակել հանրահավաքը: Ռուբեն Հախվերդյանը, իր հերթին շարունակելով իր միտքը , հիշեցրեց, որ ինքը միշտ ժողովրդի կողքին է, չի ուրացել ժողովրդին, միշտ քննադատել է իշխանություններին, սակայն ականջ դնող չկա, և որ վերջնականապես զզվել են այս իշխանություններից: «Մենք էլ , մենք էլ», -բացականչում էր ժողովուրդը: Ռուբեն Հախվերդյանը նախազգուշացրեց. «Եթե էսպես 5 տարի էլ մնա, մենք ազգովի քաշված ենք»: «Ճիշտ ես»,-համաձայնեցին ու ծափահարեցին գյումրեցիները:
Նունե ԱՐԵՎՇԱՏՅԱՆ
