Իտալիայի դատարանը այսօր մեկ տարվա ազատազրկման է դատապարտել երկրի նախկին վարչապետ, մեծահարուստ Սիլվիո Բեռլուսկոնիին` ոստիկանության կողմից գաղտնալսված զրույցների սղագրությունները իրեն պատկանող Il Giornale օրաթերթում հրապարակելու համար։
France Press լրատվական գործակալության փոխանցմամբ` գործը առնչվում է 2005 թվականին, երբ այդ սղագրությունների հրապարակումը մեկնաբանվում էր որպես ձախ կենտրոնամետ Դեմոկրատական կուսակցության ղեկավար անդամներին հաջորդ տարի անցկացվելիք ընտրությունների նախաշեմին վարկաբեկելու փորձ։
Il Giornale-ի խմբագիրը` նախկին վարչապետի եղբայր Պաոլո Բեռլուսկոնին, դատապարտվել է երկու տարի երեք ամսվա ազատազրկման։
76-ամյա նախկին վարչապետը կարող է բողոքարկել դատավճիռը, ինչը, համաձայն Իտալիայի օրենսդրության, հնարավորություն կտա միառժամանակ առկախել այն։
Կարդացեք նաև
Ակնկալվում է, որ Իտալիայի դատարանները այս ամիս եւս երկու դատավճիռ կկայացնեն Սիլվիո Բեռլուսկոնիի գործերով, որոնցից մեկը վերաբերում է 17-ամյա մարմնավաճառի հետ կապված հայտնի սկանդալին։
«Ազատություն» ռադիոկայան
