«Ամերիկայի ձայն» ռադիոկայան. Եվրոպական Միության կարգավորող մարմինները «Մայքրոսոֆթ» ամերիկյան ընկերության նկատմամբ կիրառել են 731 միլիոն դոլարի տուգանք, որի պատճառն է դարձել ընկերության կողմից համակարգչի օգտատերերին համացանցի դիտարկիչ ծրագրերի ընտրություն տրամադրելու մասին ԵՄ-ի իշխանությունների հետ ձեռք բերված համաձայնության խախտումը:
Եվրոպական Միության կորպորացիաների գծով կարգավորող մարմնի ղեկավար Հոակին Ալմինան ասել է, որ աշխարհում ծրագրային ապահովման ամենախոշոր արտադրող «Մայքրոսոֆթ» ընկերությանը ԵՄ-ի իշխանությունները վստահել էին ի կատար ածելու 2009 թվականին ձեռք բերված համաձայնությունը, որի պայմաններով ընկերությունը, բացի «Internet Explorer» համացանցի զննիչի, օգտատերերի համար պետք է հասանելի դարձներ համացանցի այլ զննիչներ:
«Մայքրոսոֆթ»-ն անցյալ տարվա հուլիսին խոստովանել է, որ մեկ տարուց ավելի այն թերացել է Եվրոպայում ավելի քան 28 միլիոն օգտատերերին զննիչների ընտրություն տրամադրելու գործում: Ընկերության համաձայն, սա եղել է սխալ, այլ ոչ թե ձեռք բերված համաձայնության մտադրված խախտում:
Եվրոպական Միության կորպորացիաների գծով կարգավորող մարմնի ղեկավարի համաձայն, «Մայքրոսոֆթ»-ի նկատմամբ կիրառված տուգանքը «կստիպի ընկերություններին լավ մտածել՝ կարգավորող մարմինների հետ ձեռք բերված համաձայնությունը խախտելուց առաջ»:
«Մայքրոսոֆթ»-ը ներողություն է խնդրել և պատասխանատվություն է ստանձնել «տեղի ունեցած տեխնիկական սխալի համար»: Ընկերությունը հայտնել է, թե քայլեր կձեռնարկի ծրագրակազմի մշակման բարելավման և ապագայում նման սխալներից խուսափելու ուղղությամբ:
Եվրոպական հակամենաշնորհային կարգավորող մարմինները վերջին տասնամյակի ընթացքում «Մայքրոսոֆթ»-ի նկատմամբ կիրառված տուգանքների ընդհանուր ծավալը կազմել է մոտ 3 միլիարդ դոլար:
