Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Ռուբեն Ափինյանը հրապարակեց «Առավոտ» եւ «Հայկական ժամանակ» օրաթերթերի դեմ 9 տարվա ազատազրկման դատապարտված, 71-ամյա Ռազմիկ Աբրահամյանի հայցով կայացրած վճիռը:
Նա դատի էր տվել թերթերին, եւ իր պատիվը, արժանապատվությունը եւ գործարար համբավն արատավորող տեղեկություններ տարածելու համար պահանջում էր յուրաքանչյուրից 2 միլիոն դրամ գումար:
Հիշեցնենք, որ «Առավոտում» սեպտեմբերի 20-ին տպագրվել էր «Պեդոֆիլը կստանա 2 տարի՞» հոդվածը, որտեղ 9 տարի առաջ անդրադարձել էինք նրա նկատմամբ հարուցված քրեական գործին: Նա սեքսուալ բնույթի գործողություններ էր կատարել 16 տարին չլրացած տղաների նկատմամբ, ուսումնական հաստատությունում մանկավարժ աշխատած տարիներին:
Դատարանը հրապարակեց վճռի եզրափակիչ մասը: Պեդոֆիլի հայցը մերժվեց ամբողջությամբ: Նրանից հօգուտ պետության կբռնագանձվի 80 000 ՀՀ դրամ գումար, որպես չվճարված պետտուրքի գումար:
