Մարտի 26-ին Տիկնիկային թատրոնում տեղի կունենա «Թատերական Online մրցանակաբաշխություն 2013»-ի մրցանակների հանձնման արարողությունը: Այսօր այս մասին «Ելակետ» ակումբում ասաց Tatron.info կայքի հիմնադիր-նախագահ Ֆրունզե Գևորգյանը:
«Մրցանակաբաշխությունը տեղի է ունենում երկրորդ անգամ, առաջինը կատարվեց փորձնական տարբերակով` հասարակության եւ մասնագետների ընկալումն արձանագրելու համար: Առաջին մրցանակաբաշխությունը մեծ հաջություն ունեցավ, ճիշտ է` մասնագետների միջեւ վեճեր եղան, բայց նմանատիպ խնդիրները այս տարի լուծվել են»,-ասաց նա:
Գևորգյանը նշեց, որ այս տարվա մրցանակաբաշխության մեջ որոշակի փոփոխություններ են մտցվել. «Անցած տարի քվեարկությանը ամեն օր կարող էին մասնակցել, իսկ այս տարի քվեարկել կարելի է մեկ համացանցային «այ փի»-ից: Դա երիտասարդների շրջանում տարաձայնությունների տեղիք է տվել, սակայն այդ կերպ խուսափում ենք կեղծիքներից: Փոփոխվեցին նաեւ անվանակարգերը: «Լավագույն թատերագետ» անվանակարգը փոխվեց «Լավագույն մշակութային լրագրողի», որովհետեւ թատերագետներն ակտիվ չէին: Ընդհանուր առմամբ` կա 13 անվանակարգ»: Գևորգյանը հավելեց, որ այս անգամ քվեարկողները չեն կարող տեսնել քվեարկության արդյունքները. «Տեսնելով առաջին կամ երկրորդ հորիզոնականում գտնվող մասնակիցներին` մարդիկ նրանց օգտին են քվեարկում` «մոռանալով» մյուսների մասին: Այդ պատճառով քվեարկության արդյունքները փակ կլինեն»: Tatron.info կայքի հիմնադիրը նաեւ ասաց, որ այս տարի մասնակիցներն ու քվեարկողներն առավել ակտիվ են, ինչը խոսում է մրցանակաբաշխության հաջողության մասին:
Tatron.info-ի գլխավոր խմբագիր Լիլիթ Տերտերյանն ասաց, որ մրցանակաբաշխության նոմինանտներն ընտրվել են online տիրույթում ակտիվ լինելու սկզբունքով. «Այդ հարցում նույնպես տարաձայնություններ եղան, որովհետեւ որոշ մարդիկ արժանի են գնահատանքի, բայց online տիրույթում ակտիվ չեն»:
Կարդացեք նաև
Մրցանակների հանձնման արարարողության ռեժիսոր Անի Աբրահամյանը հայտնեց, որ երեկոյի ընթացքում հաղորդավարները կշփվեն «սքայպի» միջոցով, իսկ ընթացքում կլինեն անակնկալներ:
Լուիզա ՍՈՒՔԻԱՍՅԱՆ