Բրիտանական խորհրդի հայաստանյան գրասենյակի հրավերով Հայաստանում է բրիտանացի ճանաչված կինոքննադատ, International Film Guide-ի խմբագիր Յան-Հեյդն Սմիթը : Նա այս օրերին դասընթացներ է անցկացնում կինոլրագրողների եւ կինոսիրողների համար: Քանի որ պարոն Սմիթը մի առիթով նշել էր, որ Հայաստանի հետ իր կապը Ատոմ Էգոյանի ֆիլմերի միջոցով է ստեղծվել, Aravot.am-ը հետաքրքրվեց՝ էգոյանական ֆիլմերի հատկապես ի՞նչ գծեր կառանձնացներ:
Կինքննադատը Էգոյանին բնորոշեց իբրեւ հանճարեղ ռեժիսոր, ասելով, որ շատ ռեժիսորների նման Էգոյանը եւս ունեցել է Հոլիվուդին շատ մոտենալու «վտանգը», եւ որ Հոլիվուդի մեջ «ներծծվելու» արդյունքում ռեժիսորը կարող էր կորցնել իր անհատական ձեռագիրը: Սակայն, ըստ նրա, Ատոմ Էգոյանին հաջողվել է պահպանել ինքնատիպությունը եւ նկարել առանձնահատուկ ֆիլմեր:
Կինոքննադատը խոսեց Էգոյանի «Էկզոտիկա», Next of King, «Օրացույց» ֆիլմերից եւ հայկական ազգային հատկանիշները դրանցում ներկայացնելու կերպից: Ինչ վերաբերում է «Արարատին», այս գործի եւ Սերգեյ Փարաջանովի ոճի ու մեթոդների միջեւ մեր զրուցակիցը մի շարք ընդհանրություններ է գտել: Ասում է. «Կարծում եմ, որ Էգոյանի հանճարեղությունն այն է, որ ժամանակակից լուծումներով պատուհան է բացում դեպի անցյալ ու նախնիների ժառանգություն»: Նմանօրինակ ֆիլմեր են՝ օրինակ Քենթ ՄաքՔենդզիի The Exiles եւ 90-ականների նկարված Smoke Signals-ը, որոնց շնորհիվ մոտիկից ծանոթացել է ամերիկյան հնդկացիների մշակույթին: Կինոքննադատի հետ հարցազրույցը՝ վաղվա տպագիր «Առավոտում»:
Կարդացեք նաև
Գոհար ՀԱԿՈԲՅԱՆ
