Այսօր Կենտրոնական ընտրական հանձնաժողովը քննեց ու մերժեց նախագահական ընտրություններին «Իրավունքի Եվրոպա միավորում» հ/ կ-ի արձանագրած ընտրախախտումների վերաբերյալ թիվ 17 ընտրատարածքային ընտրական հանձնաժողովի ընդունած որոշումը բողոքարկելու վերաբերյալ դիմումը:
Հ/կ-ն դիմումի հետ ԿԸՀ-էր ներկայացրել ընտրախախտումներն արձանագրող 47 սկավառակ:
Հանձնաժողովի քարտուղար Ա. Սմբատյանը ասաց, որ դիմումն ու սկավառակները հանձնաժողովն ուսումնասիրել ու չի հասկացել, թե տեսանյութերի որ հատվածը դիմումի որ հատվածին է վերաբերում : Հանձնաժողովի նախագահ Տիգրան Մուկուչյանն էլ պնդեց, որ սկավառակները նույնաբովանդակ են ու հարցրեց. « Ի՞նչն է պատճառը, ուղղակի ստեղծել իմիտացիա շատ սկավառակների…կան սկավառակներ, որոնց առանձին տեսանյութեր տարբեր սկավառակներում կրկնվում են»:
Հանձնաժողովում այսօր մեկ ժամից ավելի պարոն Մուկուչյանը ցուցադրեց սկավառակներից լուսանկարներ կամ տեսանյութերից ընտրված հատվածներ, որոնք տեղամասից դուրս դիտորդի զրույցն էր ձայնագրել եւ ընտրախախտումի մասին ոչինչ չկար:
Կարդացեք նաև
Նա նաեւ պնդեց, որ երեք սկավառակ պետք է հաշվի չառնվեն, որովհետեւ նույնաբովանդակ ու ոչինչ չասող են:
Հ/Կ ներկայացուցիչ Լուսինե Հակոբյանն էլ բացատրեց, որ տեխնիկական հնարավորություններ չեն ունեցել մոնտաժել, ինչ նկարել են, այդ էլ ներկայացրել են:
Հ/կ մեկ այլ ներկայացուցիչ Վահե Գրիգորյանն էլ հանձնաժողովականներին առաջարկեց. «Ժամանակն ինչի՞ համար է ծախսվում : Դուք ասացիք, բոլոր նյութերն ուսումնասիրել եք, եթե տեսել եք 47 սկավառակից 3-ում կրկնություն կա, դրեք մի կողմ այդ երեք սկավառակը: Եկեք խոսենք 44-ի մասին»:
Պարոն Մուկուչյանը նաեւ ցուցադրեց տեսանյութերից մեկից առանձնացված այն հատվածը, որտեղ դիտորդը հեռախոսազրույցի ժամանակ պատմում էր, որ հոգնել է ու ընտրողների մասին, ինչպես պարոն Մուկուչյանն ասաց, այսկերպ է արտահայտվել. «բերում են ոչխարներին, ոչխարների պես գալիս են, ընտրում են»: «Դուք իրավունք ունե՞ք սովորական քաղաքացուն անվանել ոչխար»,- դիտորդին հարցրեց պարոն Մուկուչյանը:
«Պարոն Մուկուչյան, դուք մեր ժամանակն անտեղի վատնում եք ինչ-որ պարզաբանումների վրա»,- հակադարձեց Վ. Գրիգորյանը:
«Դուք տեղյակ չեք մետաֆորաներից, նույն ընտրատարածքում բոլոր մարդկանց ուղղորդում են, եւ դա մետաֆորիկ ձեւով ես ասել եմ»,- պատասխանեց ոչխարների համեմատությունը կատարած դիտորդը:
Պարոն Մուկուչյանը շարունակեց հարցերը դիտորդին. «Եւս մի նյութում դուք փորձում եք խաթարել մի ընտրողի իրավունքը` նրան համարելով հոգեկան հիվանդ: Դիտորդը իրավունք ունի՞ խոչընդոտելու անձին կատարել իր քվաերակությունը»: Միջամտեց կրկին Վ. Գրիգորյանը. «Այստեղ խոչընդո՞տ եք տեսել: Ունե՞ք ապացույց: Հանձնաժողովի արձանագրություն կա՞, որ խոչընդոտ է տեղի ունեցել… հանձնաժողովի նիստը դուք բեսեդկի խոսակցության մակարդակի եք հասցրել: Անցեք կոնկրետ հարցերին»: Վիճաբանությունից հետո հանձնաժողովի նիստում այդպես էլ չքննարկվեցին ընտրախախտում արձանագրած տեսանյութերը: Հանձնաժողովի անդամ պարոն Սմբատյանը միանգամից կարդաց որոշումը`
Մերժել բողոքարկվող դիմումը` հիմնավորելով, որ պահանջը հստակ ձեւակերպված չէ: ԿԸՀ-ն որոշեց նաեւ դիմումով բերված նյութերն ընդունել որպես հաղորդագրություն եւ հասցեագրել գլխավոր դատախազություն:
Մանրամասները՝ տեսանյութում
Արփինե ՍԻՄՈՆՅԱՆ
