Շուտով վանաձորցիներն իրենց հարազատ քաղաքում ավելի հաճախակի կհանդիպեն եվրոպացիներին: Դա հնարավոր կլինի շնորհիվ Եվրախորհրդի կողմից ֆինանսավորվող 4 ծրագրերի 39 հազար եվրո արժողությամբ, որոնք կիրականացվեն Վանաձորում ապրիլ, մայիս, սեպտեմբեր եւ հոկտեմբեր ամիսներին: Համաձայն այդ ծրագրերի` այս տարվա ընթացքում Վանաձորում կկազմակերպվեն ամառային եւ ձմեռային ճամբարներ եվրոպական երկրների երիտասարդների համար:
Ինչպես մեզ պատմեց «Լոռեցիների միավորում» կազմակերպության նախագահ Մենուա Բրուտյանը, ապրիլի 22-28-ը երիտասարդական կազմակերպությունների ղեկավարների վերապատրաստման դասընթացներ են լինելու, որին կմասնակցեն 15 եվրոպական երկրներից 2-ական ներկայացուցիչ: Մյուսներն էլ համանման ծրագրեր են` առավելագույնը մինչև 80 մասնակցով:
Այս ամենին ընդառաջ հայաստանյան մի շարք երիտասարդական կազմակերպությունների մասնակցությամբ Վանաձորում երիտասարդական կազմակերպությունների ֆորում էր կազմակերպվել, որի ժամանակ Վանաձորը հռչակվեց համահայկական երիտասարդական մայրաքաղաք: «Վանաձորի` երիտասարդական մայրաքաղաք լինելն առաջացնում է դրական էմոցիաներ: Վերնագիր է, որի տակ կարելի է ինչ-որ բան ներկայացնել: Մենք պետք է կարողանանք ներկայանալ աշխարհին, և դրա համար պետք է քո լեյբլը ունենաս»,- ասում է Մենուան:
Վանաձորը երիտասարդական մայրաքաղաք հռչակելու նախաձեռնության մասին տեղեկացել է նաև Արևմտյան Եվրոպայի և Կովկասի «ՍԱԼՏՈ» ռեսուրսային կենտրոնը, որը փետրվարի 19-ին Վանաձորում հասարակական կազմակերպությունների աշխատանքային տոնավաճառ էր կազմակերպել, որ Հայաստանի և եվրոպական հասարակական կազմակերպությունները ծանոթանան, փորձեն համագործակցել: Եվրոպական կազմակերպությունների ներկայացուցիչները հետաքրքրվեցին Վանաձորում երիտասարդական ճամբարներ կազմակերպելու գաղափարով:
«ՍԱԼՏՈ» ռեսուրսային կենտրոնի կոորդինատոր Թոմաշ Շոփան ասաց, որ հետաքրքրված են տեղական կազմակերպությունների հետ ծանոթությամբ և հետագա համագործակցությամբ: Մենուա Բրուտյանն ասաց, որ սա շատ լավ առիթ է տեղական կազմակերպությունների համար` առավել ևս, որ Հայաստանը եվրաինտեգրման ճանապարհին է, իսկ շփումները և համագործակցությունն ինտեգրման լավագույն միջոցն են: «Սա մի մեծ եվրոպական ընտանիք է, բարով եք եկել»,- նշեց նա:
Այս համագործակցությունները հետաքրքիր կլինեն նաև վանաձորցի երիտասարդների համար, ովքեր հնարավորություն կունենան շփվելու եվրոպացի հասակակիցների հետ, կծանոթանան միմյանց մշակույթին: «Նախատեսում ենք հնարավորինս շատ միջոցառումներ կազմակերպել, որ արդյունքում Վանաձոր այցելուների թիվը մեծ լինի: Բնականաբար, այցելուն ենթադրում է նաև ֆինանսական հոսքեր, արդյունքում դա կբերի Վանաձորի զարգացմանը, կաշխատեն հյուրանոցները, խանութները, տաքսի ծառայությունները, առողջարանը, վարսավիրանոցները, որը անմիջականորեն բնակչի վրա կանդրադառնա: Մենք նախատեսում ենք տարեկան 10-12 հազար այցելու ունենալ»,- ասում է Մենուան:
Նա վերհիշում է, որ «նախկինում Վանաձորը եղել է տուրիստական և առողջարանային քաղաք` կային ճամբարներ, հյուրանոցներ, առողջարաններ, հրաշալի բնություն, իսկ կլիման մեղմ է և’ ամռանը, և’ ձմռանը»: Նրա խոսքերով, ներկայումս Վանաձորն ունի թատրոններ, թանգարաններ, «Հորովել» երգի-պարի համույթ եւ ընդհանրապես շատ բան ունի ցույց տալու, հատկապես եվրոպացիների համար:
Տիրան Մանուչյան՝ (mynews.am)
