Գեներալ Մանվել Գրիգորյանը հայտարարել է, թե նախագահական ընտրություններն անցել են ազատ եւ արդար, «հիմա էլ ամենաառաջադեմ ժողովրդավարական պետություններին բնորոշ հետընտրական պրոցեսներ են»։
«ՉԻ» – Ճիշտ կլինի, որ լրագրողներին արգելեն հարցազրույց վերցնել գեներալ Մանվելից, որովհետեւ դա խարխլում է մեր պետականության հիմքերը։ Էլ ավելի անհարմար բան է ստացվում, երբ գեներալը ոչ միայն հարցազրույց է տալիս, այլեւ փորձում է մտքեր հայտնել:
Բայց մի հարցում նա, իհարկե, իրավացի է (ինչպե՞ս կարող է գեներալ Մանվելն իրավացի չլինել): Առաջադեմ, ժողովրդավարական պետություններում ճիշտ այսպիսի հետընտրական պրոցեսներ են ընթանում։ Ընդդիմության թեկնածուն հայտարարում է, որ ինքն է հաղթել, հանրահավաքներ է անցկացնում, իսկ երբ ուսանողները փորձում են դասադուլ անել՝ տեղի «ախալքալաքցիները» (ԱՄՆ-ում՝ տեխասցիները, Ֆրանսիայում՝ պրովանսցիները եւ այլն) հարձակվում են նրանց վրա։ Այնպես որ՝ ամեն ինչ նույնն է։ Միայն մի աննշան տարբերություն կա. ժողովրդավարական պետություններում, որպես կանոն, հաղթող է հռչակվում նա, ով հաղթել է։ Իսկ մեզանում, չգիտես ինչու, միշտ հակառակն է լինում։ Իսկ մնացած հարցերում՝ ոչ մի տարբերություն։
«Չորրորդ ինքնիշխանություն»
