Քիչ առաջ Դիլիջանում ավարտվեց Րաֆֆի Հովհաննիսյանի հանդիպումը բնակիչների հետ: Դեռ ճանապարհին էինք, Դիլիջանից բնակիչներն ահազանգեցին, որ հավաքվածներին ցրում են, թույլ չեն տալիս տաքսիները կանգնեն հանդիպման վայրում, ոստիկանական մեքենաները շրջում են եւ հորդորում են «ցրվել»: Արդյունքում հանդիպումը սակավամարդ էր:
Կուսակցության գլխավոր քարտուղար Ստյոպա Սաֆարյանն իր ելույթում այդ ահուսարսափի մթնոլորտի համար «ամոթանք» տվեց նախ Դիլիջանի քաղաքապետին. «Այդ աթոռը ոչ կենսաթոշակի ժամանակ է իրենց տակ լինելու, ոչ էլ պաշտոնից հեռանալու դեպքում: Որեւէ ձեւով նրան պատիվ չի բերում նման արարքը: Բոլորդ գիտեք, որ ՀՀ նախագահ է ընտրվել Րաֆֆի Հովհաննիսյանը, ով Հայաստանում իրականացրեց բարու եւ բարեւի հեղափոխություն»:
Րաֆֆի Հովհաննիսյանի խոսքերով՝ «Ես չգիտեմ քանի հոգի հավաքվեցին, ցրեցին, չցրեցի՜ն, կարեւոր չէ»:
Մինչ պարոն Հովհաննիսյանը ելույթ էր ունենում, Զարուհի Փոստանջյանը ոստիկաններից պահանջում էր ասել, թե ինչու են նկարում հանրահավաքի մասնակիցների դեմքերը: «Թող նկարի, Զարուհի, էդ իր պարտականության մեջ է: Ավելի լավ է ինձ նկարի, քան թե ժողովրդին: Ոստիկան, ծառայությունդ բարի, ի՛նձ նկարի»,- միջամտեց Րաֆֆի Հովհաննիսյանը:
Կարդացեք նաև
Նա նաեւ ընդգծեց, որ Դիլիջանն անգամ պաշտոնական տվյալներով 45 տոկոս ձայն է տվել իրեն. «Պաշտոնական, պատկերացրեք, թե իրականը որն է եղել: 65 է եղել, բայց հիմա մենք թվաբանության համար չենք եկել: Դրա համար մեր ժողովրդի ուժը չի չափվում գլխաքանակով: Յուրաքանչյուր այսօր ներկա ներկայացնում է 1000 հոգի որակյալ քաղաքացիներ, ովքեր փետրվարի 18-ին չվախեցան: Բոլորը գիտեն, որ դիլիջանցիք չվախեցան: Հիմա մեկը համալսարանում է, մեկը շուկայում, մեկը խանութ ա պահում, երեխու համար հաց է վաստակում, անպայման չի, որ այստեղ լինի կամ Երեւանում: Քանակով չի չափվում, տղե՛րք: Մեր հաղթանակն ամեն տեղ է՝ ընտանիքում, բնակավայրում, որտեղ հայ մարդը կա: Մեր հաղթանակը հենց դրանում է»:
Պարոն Հովհաննիսյանը նաեւ հայտարարեց. «Դիլիջանը դառնալու է համաշխարհային կենտրոն ոչ միայն զբոսաշրջային, այլ նաեւ վերադարձի կենտրոն: Իմ մեղրամիսն անցել է Դիլիջանում՝ Հաղարծինում: Եվ քանի մեղրամիս է գալու Դիլիջան»:
Հռիփսիմե ՋԵԲԵՋՅԱՆ
