«Առավոտին» տված հարցազրույցում կարծիք էի հայտնել, թե կարելի էր ավելի լավ դասական երաժիշտների հրավիրել Հայաստան: Ինչ վերաբերում է իմ արած «կույր, խուլ եւ համր» արտահայտությանը, ցավում եմ, եթե դրանով ակամա վիրավորել եմ մարդկանց: Հաստատ նման ցանկություն կամ միտում չեմ ունեցել, ավելին, ինքս բարեգործական համերգներ կազմակերպող արվեստագետ եմ, ու միշտ էլ համոզված եմ եղել, որ սահմանափակ ֆիզիկական հնարավորությունները տաղանդի հետ բնավ կապ չունեն: Հարցազրույցում ուղղակի մտահոգություն էի հայտնել, որ երբեմն ոչ որակյալ արվեստ են հրամցնում հանրությանը, իմ արած արտահայտությունն էլ անորակի դեմ էր, ոչ թե մարդկանց: Հայցում եմ նրանց ներողամտությունը, ում վիրավորել եմ:
Հայաստանի պետական կամերային նվագախմբի գեղարվեստական ղեկավար եւ գլխավոր դիրիժոր Վահան ՄԱՐՏԻՐՈՍՅԱՆ
Հ. Գ. –Հիշեցնենք, որ Հայաստանի պետական կամերային նվագախմբի գեղարվեստական ղեկավար եւ գլխավոր դիրիժոր Վահան Մարտիրոսյանին բաց նամակով դիմել էր տեսողական խնդիր ունեցող Արտակ Բեգլարյանը, նաեւ Facebook-ում էր համապատասխան ակցիա սկսվել, որի մասնակիցները պահանջում էին, որ դիրիժորը ներողություն խնդրի:
