Անպտղության կառուցվածքում 10-15 %-ը կազմում է չբացահայտված ծագման անպտղությունը, որը ներկա պայմաններում հնարավոր չէ հայտնաբերել:
Այսօր «Ելակետ» ակումբում բժշկական համալսարանի սեքսապաթոլոգիայի ամբիոնի վարիչ Սեւադա Հակոբյանը նկատեց, որ մեր երկրում արական անպտղության աճ կա: Հայաստանում անպտղության վերաբերյալ կոնկրետ փաստեր, ուսումնասիրություններ, որոնք կփաստեն անպտղության աստիճանը, պարոն Հակոբյանն ասաց, որ չեն արվել, բայց ըստ դիմելիության պարզ է դարձել, որ արական անպտղության աճ է նկատվում:
Սեւադա Հակոբյանի խոսքերով, անպտղության դեպքերի կեսը նկատվում է կանանց մոտ, դեպքերի կեսն էլ բաժին է հասնում տղամարդկանց: Սակայն, ըստ մասնագետի, անպտղության կառուցվածքում 10-15 %-ը կազմում է չբացահայտված ծագման անպտղությունը, որը ներկա պայմաններում հնարավոր չէ հայտնաբերել:
Սեւադա Հակոբյանը խորհուրդ է տալիս կատարել պարտադիր հետազոտություններ եւ աղջիկների ու տղաների մոտ, որի ընթացքում կարող են հայտնաբերվել «սեռական գեղձերի աճման որոշակի դիսբալանսներ», որոնք, ըստ բժշկի, կարելի է շատ ավելի կարճ ժամանակահատվածում կանխել: Կանխման համար, պարոն Հակոբյանի խոսքերով, նաեւ անհրաժեշտ է ճիշտ սնվել:
Ըստ մասնագետի, «յուրաքանչյուր խնդիր ունի յուրատեսակ մոտեցում: Հայաստանում նման խնդիրների բուժման արժեքը կախված է պրոբլեմի խորության աստիճանից, կախված՝ թե ինչ գործոններ են մեծ նշանակություն ունեցել, որոնք են գերակշռող, հետեւապես հիվանդով զբաղվում է թիմ՝ սեքսապաթոլոգ, ուրոլոգ, անթրոլոգ, որոնք յուրաքանչյուրը յուրատեսակ ձեւով է մոոտենում պրոբլեմին, այդ պատճառով էլ կոնկրետ գին սահմանել հնարավոր չէ»:
Սեւադա Հակոբյանը, վկայակոչելով Առողջապահության համաշխարհային կազմակերպության տվյալները, նշեց, որ աշխարհում 2-3 միլիոն նոր ամուսնական զույգ ունեն անպտղություն: Ընդհանուր առմամբ, պոպուլյացիայի մակարդակով 7 % է կազմում անպտղության խնդիրը:
Կարդացեք նաև
Սուսաննա ՕՀԱՆՅԱՆ
