Ազգային վիճակագրական ծառայությունը (ԱՎԾ) փետրվարի ամսական գնանկման պայմաններում արձանագրել է տարեկան գնաճի տեմպի արագացում։ Փետրվարին 12-ամսյա գնաճը կազմել է 3,1%, այն դեպքում, երբ հունվարին 2,6% էր։
Ազգային վիճակագրական ծառայության տվյալներով՝ այս տարվա փետրվարին հունվարի համեմատ սպառողական շուկայում արձանագրվել է 0,4% գնանկում: Պարենային ապրանքների (ներառյալ ոգելից խմիչք և ծխախոտ) գները նշված ժամանակահատվածում նվազել են 0,7%-ով, ոչ պարենային ապրանքներինը՝ 0,2%-ով, ծառայությունների ոլորտում գրանցվել է սակագների ընդհանուր մակարդակի 0,1% հավելաճ։
2013թ. փետրվարին, 2012թ. նույն ամսվա համեմատ, գնաճը կազմել է 3,1%, այդ թվում՝ պարենային ապրանքների (ներառյալ ոգելից խմիչք և ծխախոտ) գներն աճել են 2,8%-ով, ոչ պարենային ապրանքներինը՝ 5,5%-ով, ծառայությունների սակագները՝ 2,3%-ով։
Փետրվարին 12-ամսյա գնաճի տեմպի արագացումը ուշագրավ է, քանի որ ամսական կտրվածքով (հունվարի համեմատ) տեղի է ունեցել ոչ թե գնաճ, այլ գնանկում։ Համեմատության համար՝ 2012թ. փետրվարին ամսական կտրվածքով գնանկման պայմաններում տեղի էր ունեցել նաև տարեկան գնաճի տեմպի նվազում։
Կարդացեք նաև
ԱՎԾ հրապարակումից երևում է, որ պարենային ապրանքների շուկայում փետրվարին 12-ամսյա գնաճը պայմանավորված է եղել մսամթերքի (3,3%), ձվի (4,4%), ծխախոտի և ոգելից խմիչքի (5,1%) գների աճով։ Մյուս կողմից՝ կարտոֆիլի և բանջարեղենի ապրանքային խմբում գները նվազել են 5,8%-ով, մրգի գները՝ 3,1%-ով։
«Օրակարգ»
