ԵԱՀԿ/ԺՄԻԳ դիտորդական առաքելությունն օրերս հրապարակեց հետընտրական հերթական միջանկյալ զեկույցը: Անդրադառնալով ՀՀ նախագահական ընտրությունների ընթացքում որոշ տեղամասերում գրանցված մասնակցությունների թվին և ՀՀ նախագահ Սերժ Սարգսյանի ստացած ձայների քանակի հարաբերակցությանը, զեկույցում մասնավորապես նշված է. «Փետրվարի 25-ին Հայաստանի ԿԸՀ հրապարակած պաշտոնական արդյունքի վերլուծությունը՝ ԵԱՀԿ/ԺՄԻԳ-ի առաքելության կողմից, խիստ մեծ համեմատականություն է ցույց տալիս ընտրողների բարձր մասնակցության և գործող նախագահ թեկնածուի ստացած ձայների միջև: Սա մտահոգություն է առաջացնում ընտրական գործընթացի վստահելիության նկատմամբ»:
Aravot.am-ը ԱԺ պետաիրավական հարցերի մշտական հանձնաժողովի նախագահ, Սերժ Սարգսյանի նախընտրական շտաբի պետի տեղակալ Դավիթ Հարությունյանի հետ զրույցում հետաքրքրվեց հիմնավո՞ր է ԵԱՀԿ/ԺՀՄԻԳ-ի քննադատությունը: Նա այսպես պատասխանեց. «Ես հասկանում եմ, որ ոմանք կարող են մտահոգված լինել, սակայն դա ամենևին չի նշանակում, որ առկա է մտահոգության հիմք: Օրինակ՝ նույն զեկույցում նշված է, որ այն ընտրատեղամասերում, որտեղ շատ ցածր էր մասնակցության տոկոսը, որպես կանոն Սերժ Սարգսյանի համեմատ ավելի շատ ձայներ էր հավաքել Րաֆֆի Հովհաննիսյանը: Դա ունի իր բացատրությունը: Բանն այն է, որ ընդդիմադիր տրամադրություն ունեցող ընտրողները միշտ ավելի ակտիվ են: Դա հայաստանյան օրինաչափություն չէ, դա գործում է ամենուր: Նրանք միշտ ակտիվ մասնակցում են ընտրություններին՝ ի տարբերություն ոչ ընդդիմադիր տրամադրություն ունեցող ընտրողների: Վերջիններս երբեմն վստահ լինելով հաղթանակի վրա՝ հաճախ անգամ չեն ներկայանում քվեարկության:
Այն ընտրատեղամասերում, որտեղ Սերժ Սարգսյանի նախընտրական շտաբը կարողացել է ակտիվ աշխատել և թույլ չտալ, որ իշխանական ընտրազանգվածը պասիվ մնա, բնականաբար թե մասնակցությունը, թե Սերժ Սարգսյանի ստացած ձայները պետք է ավելի բարձր լինեին: Իհարկե կան այլ օբյեկտիվ պատճառներ ևս: Ինչ վերաբերում է մտահոգություններին, ապա դրանց հիմքն այն է, որ որոշ դատապարտելի երևույթներ ևս կարող էին նման պատկեր տալ: Բայց դա չի նշանակում, որ հակառակ հետևությունը ճիշտ է: Արդյունքների համադրումն այն տեղամասերում, որտեղ հանձնաժողովները ղեկավարում էին ընդդիմադիր խմբակցությունների ներկայացուցիչները՝ համահանրապետական արդյունքների հետ, ցույց են տալիս, որ նման մտահոգությունները անտեղի են»:
Մեր այն հարցին, թե ինչ գնահատական կտա զեկույցին, պարոն Հարությունյանն այսպես պատասխանեց. «Նման զեկույցները միշտ մեր ուշադրության կենտրոնում են լինում: Կարծում եմ, որ եթե ընտրությունների հանդեպ վստահության մթնոլորտը Հայաստանում լիներ պատշաճ, նման մտահոգություն չէր լինի: Ուրեմն առաջնահերթ անելիքներ ունենք վստահության ոլորտի հետ կապված, բայց ոչ թե թվերի»:
Կարդացեք նաև
ԿԸՀ նախագահ Տիգրան Մուկուչյանն էլ նշեց, որ զեկույցում ընդամենը փաստել են որոշակի հանգամանքներ՝ առանց որևէ դատողության: Այնուհետև մանրամասնեց. «Զեկույցում ավելի շատ վկայակոչում են որոշակի հանգամանքներ և այդ հանգամանքների հետ կապված արվում դատողություններ: Եթե ֆիքսված է փաստ, ուրեմն պետք է մանրակրկիտ դատողություններ արվեն: Օրինակ՝ բազմաթիվ տեղամասեր կան, որտեղ փոքր քանակով ընտրողներ են գրանցվել: Առկա են տեղամասեր ,որտեղ զինծառայողներն են քվեարկել, կամ դատապարտյալները: Ուստի յուրաքանչյուր պարագայում առկա են պարզաբանումներ: Իսկ այդ համատեքստում իրենք ընդամենը ֆիքսել են փաստը: Այդ դեպքում պետք էր լսել և պարզել հանգամանքները: Իսկ զեկույցում ընդամենը փաստել են զուտ այն մեխանիկական թերությունները, որոնք ամրագրված են»:
Տաթև ՀԱՐՈՒԹՅՈՒՆՅԱՆ
Մի հարց կա,տեղին թե անտեղի ազգովի սիրում եք կրկնել;Դու, Մուկուչյանը,Սերժիկը միասին կրկնեք.,,Ո*վ ենք մենք, որտեղից ենք գալիս և…Պատասխանը ձեզ շա~~~տ սիրող ազգը կտա;Չէ, որ քիչ եք, սակայն ձեզ …ի*նչ են ասում;
ԵԱՀԿ/ԺՄԻԳ -ի փոխարեն, մի անգամ էլ լուրջ վերլուծություններ ու դատողություններ դուք արեք: