«Եկեք մենք՝ ժողովուրդս ստեղծենք Սահմանադրական դատարան, գուցե այդ ժամանակ պարզ լինի՝ ով խախտեց սահմանադրական կարգը երկրում»,-ասում է Աշոտ Մանուչարյանը:
«Իշխանությունը չի կարող ստեղծել մի այնպիսի համակարգ, որում ժողովուրդը ապրի նորմալ պայմաններում. իշխանությունը գտնվում է քսակի փիլիսոփայության մեջ: Դրան հասնելու ունակ է միայն շարժումը, որ, իհարկե, գտնվում է քսակի ազդեցության տակ, սակայն այն աստիճանի չէ, ինչ իշխանությունը»,- այսօր «Նոյյան տապան» մամուլի կենտրոնում ասաց «Ղարաբաղ» կոմիտեի նախկին անդամ Աշոտ Մանուչարյանը:
Պարոն Մանուչարյանը, խոսելով առկա քաղաքական վիճակի մասին, ասաց. «Այն քաղաքական շարժումը, որն ունենք այսօր, միաժամանակ նման եւ տարբեր է 2008-ի շարժումից: Նմանությունն այն է, որ Րաֆֆի Հովհաննիսյանը ինչպես եւ Լեւոն Տեր-Պետրոսյանը օգտագործոււմ են այնպիսի տերմիններ եւ խոսում այնպիսի բաների մասին, ինչպիսիք են՝ սահմանադրական եղանակ, ազատ եւ անկախ ընտրություններ, ժողովրդավարություն: Ամեն ինչ կփոխվի, եթե ղեկավարներից գոնե մեկը սկսի խոսել այլ բաներից, քան սրանք են»:
Խոսելով 2008-ի եւ 2013-ի շարժման ընդհանրությունների եւ տարբերությունների մասին՝ Աշոտ Մանուչարյանը նշեց. «2008-ի շարժման ժամանակ մենք ունեինք մի մարդկային զանգված, որին կարող ենք կոչել լեւոնասեր, մյուս ավելի ստվար զանգվածին կկոչենք ռոբասերժ, իսկ այս երկուսի մեջտեղում ժողովրդի այն մասն է, որն այս երկուսից ոչ մեկին չի հարում: Այս տարվա շարժմանն ունենք նույն պատկերը. ժողովրդի մի մասը սատարում է Րաֆֆի Հովհաննիսյանին, մյուս մասը՝ գործող նախագահին, իսկ նրանց մեջտեղում կրկին մնում է ժողովրդի ձեռնպահ զանգվածը»:
Աշոտ Մանուչարյանը կարծում է, որ ի տարբերություն 2008-ի շարժման, այս տարվա քաղաքացիական շարժումը իր կողմն է ներգրավել երիտասարդների, սակայն այս երկու շարժումների ընդհանրությունն էլ այն է, որ երկուսի դեպքում էլ սահմանափակվում են շարժման մասնակիցների գործողությունները. «Մեր ուսանողներին, որոնք ցանկանում էին մասնակցել դասադուլին, առաջարկում էին դասադուլ անել դասերից հետո, իսկ 2008-ին Երեւան եկող երթուղայինները կանգնեցվել էին»:
Աննա ԹԱՄԱՆՅԱՆ
Կարդացեք նաև
Արդյո՞ք շատ մեծ բեռ չի թողնվում Ռաֆֆիի ուսերին: Իսկ որտե՞ղ է մտավորականություն կոչվածը:
Բացի մեկ տասնյակ Մարդուց, մնացածը,՝ տեր-գուլոյաններ ու մազմուզյաններ են: