Դասադուլը շարունակվում է
«Պոստ Սկրիպտում» մամուլի ակումբում այսօր դասադուլի կազմակերպման նախաձեռնող խմբի անդամներ, ուսանողներ Աննա Դավթյանը (ԵՊՄՀ) և Լիլիթ Հարությունյանը (ԵՊՃՇՀ) խոսեցին դասադուլի կազմակերպման դրդապատճառների մասին: «Կեղծվել են ՀՀ նախագահական ընտրությունների արդյունքները` ինչպես ընտրությունների օրը, այնպես էլ դրանցից հետո, երբ ԿԸՀ-ն հաստատեց դրանք»,-ասաց Լիլիթ Հարությունյանը: Խոսելով դասադուլի ընթացքից` նա փաստեց. «Առաջին օրը կազմակերպված երթն ուղղված էր նրան, որ քաղաքացիներին իրազեկենք դասադուլի մասին եւ հնչեցնենք մեր պահանջները: Եղանք համալսարաններում, հադիպեցինք խոչընդոտների, արձանագրեցինք, որ որոշ համալսարաններ սահմանափակում էին ուսանողների ազատ տեղաշարժման իրավունքը: Իսկ որոշ ուսանողներ իրենց համալսարանների կողմից ուղարկվել էին մեզ խոչընդոտելու համար` շարժումն այլ դաշտ տեղափոխելու նպատակով: Մենք ցանկանում էինք հասկացնել, որ եկել ենք ոչ թե ստիպելու համար մեզ միանալ, այլ կարծիք հայտնելու»:
Աննա Դավթյանի խոսքով. «Ինքնաբուխ կազմակերպված դասադուլի մասնակիցները հավատում են, որ կարող են հաղթանակի հասնել: Եթե մեզանից ուժ չներկայացնեինք, այսքան հսկողություն չէին սահմանի, ուսանողներին չէին սպառնա, ոստիկանությունն էլ մեծ խմբով չէր վերահսկի մեզ»: Ուսանողուհու դիտարկմամբ` բացակայությունները կազդեն ուսման պրոցեսի վրա, սակայն դասադուլավորներին իրավունք չունեն բուհից հեռացնել:
«Ուսանողները գիտեն, որ թե որքան կարելի է բացակայել եւ գործում են իրենց իրավունքների սահմաններում»,-իր հերթին ասաց Լիլիթ Հարությունյանը:
Կարդացեք նաև
Դասադուլը շարունակվում է:
Լուիզա ՍՈՒՔԻԱՍՅԱՆ
